एनपिएलमा आज विराटनगर किंग्स र चितवन राइनोज आमनेसामने हुँदै

काठमाडौँ । नेपाल प्रिमियर लिग ९एनपिएल० अन्तर्गत आज एक मात्र खेल हुँदैछ। विराटनगर किंग्स र चितवन राइनोज बीच दिउँसो ४ बजेदेखि खेल हुनेछ। जारी लिगमा विराटनगर उत्कृष्ट फर्ममा छ — उसले लगातार तीन खेल जितेर अपराजित रहेको छ। विराटनगरले पहिलो खेलमा पोखरा एभेन्जर्सलाई ५३ रनले, दोस्रो खेलमा काठमाडौं गोर्खाजलाई ५ विकेटले र तेस्रो खेलमा जनकपुर बोल्ट्सलाई ९ रनले हराएको थियो।

चितवन राइनोजले दुई खेलमध्ये एक जित र एक हार व्यहोरेको छ। उसले पहिलो खेलमा कर्णाली याक्सलाई ४ विकेटले हराएको थियो भने दोस्रो खेलमा लुम्बिनी लायन्ससँग ६ विकेटले पराजित भयो।

अंकतालिकामा विराटनगर ६ अंकसहित दोस्रो स्थानमा छ भने दुई खेल खेलेको चितवन २ अंकसहित पाँचौँ स्थानमा छ।

सन्दीप लामिछानेको कप्तानीमा रहेको विराटनगरमा लोकेश बम, प्रतिश जिसीजस्ता राष्ट्रिय खेलाडी तथा जर्ज मुन्सी, मार्टिन गप्टिल, मर्चेन्ट डी लंगे, फाफ डु प्लेसिसलगायत विदेशी खेलाडी छन्। कुशल मल्लको कप्तानीमा रहेको चितवनमा रिजन ढकाल, कलमसिंह ऐरी, देव खनालसहित रवि भोपारा, सोहेल तनवीर, डेविड मलानलगायत विदेशी खेलाडी रहेका छन्।