सांसदहरुको प्रश्न – ‘एम अधिकारी’ गभर्नर महाप्रसाद अधिकारी हुन् कि होइनन् ?

काठमाडौँ, २९ असार । प्रतिनिधि सभामा एमालेको अर्थ तथा योजना विभागमा सदस्य बनेका एम अधिकारी खोटाङको खोजी भएको छ ।

प्रतिनिधि सभाको आजको शुन्य समयमा बोल्दै गठबन्धन सांसदहरुले एमालेको अर्थ तथा योजना विभागमा सदस्य बनेका एम अधिकारी नेपाल राष्ट्र बैंकका गभर्नर महाप्रसाद अधिकारी हुन वा होइन सोको जानकारी लिन आग्रह गरेका छन् ।

सांसदहरुले खोटाङ जिल्ला नेकपा एमालेको सदस्यको रुपमा एम अधिकारीको नामबाट गभर्नर महाप्रसाद अधिकारीको सदस्यता रहेको विषयमा जानकारी माग गर्नुभएको हो ।

माओवादी केन्द्रकी सांसद रेखा शर्माले राष्ट्र बैंक ऐन तथा नियमावली अनुसार गभर्नर र डेपुटी गभर्नर कुनै पनि दलमा आबद्ध व्यक्ति नियुक्ति हुन नमिल्ने व्यवस्था रहेको भन्दै यसबारे छानबिन गर्न माग गर्नुभएको छ ।

माओवादी केन्द्रकी अर्की सांसद अमृता थापाले पनि यसबारे छानबिन गरेर दोषीलाई कारबाही गर्न माग गर्नुभयो ।

नेपाली काँग्रेसका सांसद गगन कुमार थापाले पनि देशमा बढ्दो आर्थिक समस्या समधान गर्न र राष्ट्र बैंकले शेयर बजारलाई व्यवस्थित गर्न भनेर ल्याएको ४÷१२ को नियम प्रभावकारी नभएकोले पुनर्विचार गर्न गभर्नर एमालेका सदस्य एम अधिकारीलाई होइन, गभर्नर महाप्रसाद अधिकारीलाई आग्रह गर्दछु भन्दै व्यंग्यात्मक विरोध गर्नुभयो ।

माओवादी केन्द्रका सांसदहरुले एम अधिकारीको नामबाट एमाले सदस्य रहेका गभर्नर नै भएको पुष्टि भएको दावी छ ।

नेकपा एमालेले असार २६ गते जारी गरेको अन्तर पार्टी निर्देशनको अर्थ विभागमा एम अधिकारी खोटाङ राखेपछि यसले राजनितिमा हलचल ल्याएको छ । एम अधिकारी भनेको गभर्नर महाप्रसाद अधिकारी नै भएको सर्वत्र चर्चापछि गभर्नर अधिकारीले ट्विटरमार्फत एमाले अर्थ विभागमा रहेको मानिस आफू नभएको स्पष्टिकरण दिएका छन् ।