विष्णु पौडेलको पक्राउ राजनीतिक प्रतिशोध भएको एमालेको आरोप

काठमाडौँ । नेकपा एमालेका महासचिव शंकर पोखरेलले पार्टीका उपाध्यक्ष विष्णु पौडेललाई सरकारले राजनीतिक प्रतिशोधका कारण पक्राउ गरेको आरोप लगाएका छन्।

प्रहरीले सोमबार सुर्खेतबाट पौडेललाई नियन्त्रणमा लिएको थियो। यस विषयमा पोखरेलले सामाजिक सञ्जाल फेसबुकमार्फत आफ्नो धारणा सार्वजनिक गरेका छन्। उनका अनुसार कुनै व्यक्तिलाई पक्राउ गर्नुअघि निष्पक्ष अनुसन्धान गर्ने, तथ्य र प्रमाण संकलन गर्ने तथा आवश्यक परे अदालतको प्रक्रिया अघि बढाउने काम हुनुपर्छ। तर पौडेललाई पार्टी कार्यक्रममा सहभागी भइरहेका बेला योजनाबद्ध रूपमा पक्राउ गरिएको उनले बताएका छन्।

पोखरेलका अनुसार केही दिनअघि सम्पत्ति शुद्धीकरण विभागका महानिर्देशकले पौडेललाई फोन गरी काठमाडौं आएपछि सम्पर्क गर्न अनुरोध गरेका थिए। तर त्यसको केही समयपछि सुर्खेत प्रहरीलाई उनलाई नियन्त्रणमा लिन निर्देशन दिइएको भन्दै उनले यस घटनामा अदृश्य शक्ति केन्द्रको प्रभाव देखिएको दाबी गरेका छन्।

उनले अनुसन्धान गर्ने निकायहरू स्वतन्त्र र निष्पक्ष हुनुपर्ने तथा राजनीतिक पूर्वाग्रह वा प्रतिशोधका आधारमा काम गर्न नहुने बताएका छन्। एमाले सधैं निष्पक्ष न्याय र कानुनी शासनको पक्षमा रहेको उल्लेख गर्दै उनले पौडेलको गिरफ्तारी पूर्वाग्रही र प्रतिशोधपूर्ण देखिएको बताएका छन्। साथै, यस घटनाविरुद्ध एमालेले कानुनी र राजनीतिक रूपमा प्रतिवाद गर्ने चेतावनी दिएको छ।