२४ घण्टाभित्र लाइसेन्स छाप्ने व्यवस्था लागू

काठमाडौं। सरकारले ट्रायल उत्तीर्ण गरी राजस्व बुझाएपछि २४ घण्टाभित्र सवारी चालक अनुमतिपत्र छाप्ने व्यवस्था लागू गरेको छ। नयाँ व्यवस्थाअनुसार सेवाग्राहीले अब लामो समय कुर्नु नपर्ने अपेक्षा गरिएको छ।

सञ्चार तथा सूचना प्रविधिमन्त्री डा. विक्रम तिमिल्सिनाले काभ्रेको पनौतीस्थित सुरक्षण मुद्रण केन्द्रको निरीक्षणका क्रममा यस्तो जानकारी दिएका हुन्। उनले लाइसेन्स छपाइ प्रक्रियालाई अझ तीव्र र प्रभावकारी बनाउन सम्बन्धित निकायलाई निर्देशनसमेत दिएका छन्।

मन्त्री तिमिल्सिनाले लामो समयदेखि देखिएको लाइसेन्स वितरणको समस्या अन्त्य गर्न सरकार प्रतिबद्ध रहेको उल्लेख गर्दै बाँकी सबै लाइसेन्स आगामी असार मसान्तभित्र छापिसक्ने लक्ष्य राखिएको बताए। उनका अनुसार सेवाग्राहीले अब छिटो र सहज रूपमा सेवा पाउनेछन्।

निरीक्षणका क्रममा उनले सुरक्षण मुद्रण केन्द्रलाई सक्षम र प्रभावकारी संस्थाका रूपमा विकास गर्नुपर्नेमा जोड दिए। विगतमा व्यवस्थापन र इच्छाशक्ति अभावका कारण ढिलाइ भएको उल्लेख गर्दै अब ती कमजोरी हटाउँदै अघि बढ्ने प्रतिबद्धता व्यक्त गरे।

मन्त्री तिमिल्सिनाले अर्बौँ रकम खर्च गरेर खरिद गरिएका उपकरण लामो समयसम्म प्रयोगविहीन रहेकोप्रति ध्यानाकर्षण गराउँदै तिनलाई पूर्ण रूपमा सञ्चालनमा ल्याइने बताए। करिब एक अर्ब रुपैयाँबराबरका उपकरण उपयोगबिहीन रहनु दुःखद भएको उल्लेख गर्दै उनले अब तिनको प्रभावकारी उपयोग गरिने जानकारी दिए।

साथै उनले केन्द्रलाई नागरिकको विवरणको सुरक्षालाई प्राथमिकतामा राख्न र सेवाग्राहीमैत्री सेवा दिन निर्देशन दिएका छन्। देशभर सूचना प्रविधिको पहुँच विस्तार र सेवा गुणस्तर सुधारलाई प्राथमिकतामा राखिएको उल्लेख गर्दै आगामी एक वर्षभित्र सबै नागरिकलाई प्रविधिको पहुँचमा ल्याउने लक्ष्यसमेत सार्वजनिक गरिएको छ।

हाल सुरक्षण मुद्रण केन्द्रले दैनिक करिब ४० हजार लाइसेन्स छापिरहेको छ। विदेश जाने नागरिकका लागि आवश्यक लाइसेन्सलाई प्राथमिकता दिइँदै वैशाख १२ गतेभित्र करिब १२ लाख र बाँकी १७ लाख लाइसेन्स असार मसान्तसम्म छापिसक्ने लक्ष्य निर्धारण गरिएको छ।