बिरामीको हित सर्वोपरि राख्न स्वास्थ्य मन्त्रालयको निर्देशन

काठमाडौं, । इन्धन खपत घटाउने उद्देश्यले सरकारले सार्वजनिक क्षेत्रमा शनिबार र आइतबार दुई दिन बिदा लागू गरेसँगै स्वास्थ्य सेवा क्षेत्रमा देखिएको अवरोधप्रति स्वास्थ्य तथा जनसंख्या मन्त्रालयले चासो व्यक्त गर्दै नयाँ निर्देशन जारी गरेको छ। संवेदनशील क्षेत्रका रूपमा स्वास्थ्य सेवालाई निरन्तर सञ्चालन गर्नुपर्ने भन्दै मन्त्रालयले आइतबार सेवा सञ्चालन गरी सोको सट्टा अन्य दिन बिदा दिन स्वास्थ्य संस्थाहरूलाई यसअघि निर्देशन दिएको थियो।

तर कतिपय स्वास्थ्य संस्थाले उक्त निर्देशन कार्यान्वयन नगर्दा आइतबार ओपीडी सेवा प्रभावित भएको छ। विभिन्न अस्पतालमा सयौँ बिरामी उपचारका लागि लाइनमा बसे पनि सेवा नपाएपछि फर्किन बाध्य भएको अवस्था देखिएको छ। यसबीच नेपाल चिकित्सक सङ्घले चिकित्सकलाई दोस्रो दर्जाको नागरिकसरह व्यवहार गरिएको आरोप लगाउँदै पर्याप्त जनशक्ति व्यवस्थापन र सेवा–सुविधाको सुनिश्चितता नभएसम्म आइतबार सेवा सञ्चालन गर्न नसकिने जनाएको छ।

विवादपछि मन्त्रालयले आइतबार दिउँसो पुनः विज्ञप्ति जारी गर्दै नयाँ कार्यविधि तयार नभएसम्म उपलब्ध जनशक्ति र कार्यभारको आधारमा यथासम्भव स्वास्थ्य सेवा प्रवाह गर्न सबै अस्पतालहरूलाई निर्देशन दिएको छ। मन्त्रालयले बिरामीको हितलाई सर्वोपरि राख्दै सेवा निरन्तरतामा जोड दिएको छ।

मन्त्रालयका अनुसार कतिपय अस्पतालले जनशक्ति अभाव देखाउँदै सेवा सञ्चालन गर्न असमर्थता जनाएपछि यस्तो लचकता अपनाइएको हो। साथै, स्वास्थ्यकर्मीको विश्राम अधिकार र बिरामीको उपचार अधिकारबीच सन्तुलन कायम गर्न नयाँ कार्यविधि तयार पारेर कार्यान्वयन गरिने पनि उल्लेख गरिएको छ।

मन्त्रालयले आइतबार सेवा सञ्चालन गर्ने अस्पतालप्रति आभार व्यक्त गर्दै स्वास्थ्य सेवा जस्तो अत्यावश्यक क्षेत्रमा निरन्तर सेवा प्रवाह सुनिश्चित गर्नु सबैको साझा दायित्व भएको स्पष्ट पारेको छ।