नागरिक एपमा नयाँ सेवा विस्तार तीव्र , ‘वन–स्टप’ प्लेटफर्म बन्दै

काठमाडौं । सरकारले डिजिटल सुशासनलाई बलियो बनाउने लक्ष्यसहित नागरिक सेवाहरू अनलाइनमार्फत उपलब्ध गराउने काम तीव्र बनाएको छ। यसअनुसार निजामती कर्मचारीको व्यक्तिगत विवरण, लोक सेवा आयोगका परीक्षार्थीको प्रवेशपत्र र वैदेशिक अध्ययनका लागि आवश्यक नो अब्जेक्सन सर्टिफिकेट (एनओसी) अब नागरिक एपमार्फतै पाउने व्यवस्था अन्तिम चरणमा पुगेको छ।

सूचना प्रविधि विभागका महानिर्देशक चन्द्र साहका अनुसार प्रणाली अहिले परीक्षणमा छ र करिब एक साताभित्र पूर्ण रूपमा लागू हुने तयारी छ। चैत १३ गते मन्त्रिपरिषद्ले स्वीकृत गरेको १०० बुँदे शासकीय सुधार कार्ययोजनाअन्तर्गत यो कार्यक्रम समावेश गरिएको हो।

सञ्चार तथा सूचना प्रविधि मन्त्रालयले सम्बन्धित निकायलाई समयसीमाभित्र काम सम्पन्न गर्न निर्देशन दिएको छ। मन्त्री डा. विक्रम तिमिल्सिनाले पनि नागरिक एपमार्फत थप सेवा विस्तार गर्न निर्देशन दिनुभएको छ।

यसै क्रममा इन्जिनियरिङ परिषद्सँग सम्झौता गरी इन्जिनियरहरूको प्रमाणपत्र पनि एपमै उपलब्ध गराउने तयारी छ। यसअघि नै प्रहरी चारित्रिक प्रमाणपत्र सेवा सुरु भइसकेको छ। अब नागरिक एपलाई सबै सरकारी सेवाको एकीकृत डिजिटल प्लेटफर्म बनाउने लक्ष्य लिइएको छ।