कार्की आयोगको प्रतिवेदन पूर्वाग्रही र प्रतिशोधपूर्ण भएको पूर्वगृहमन्त्री लेखकको दाबी

काठमाडौं ।  नेपाली कांग्रेसका नेता तथा पूर्वगृहमन्त्री रमेश लेखकले ‘जेनजी आन्दोलन’सँग सम्बन्धित घटनाको छानबिन गर्न गठित आयोगको प्रतिवेदनलाई पूर्वाग्रही, प्रतिशोधपूर्ण र अप्रमाणित भएको आरोप लगाउनुभएको छ। सर्वोच्च अदालतको आदेशपछि १३ दिनको प्रहरी हिरासतबाट रिहा हुनुभएका लेखकले आफूविरुद्ध दायर गरिएको फौजदारी मुद्दा नै उक्त पक्षपाती प्रतिवेदनमा आधारित रहेको दाबी गर्नुभएको हो।

रिहाइको भोलिपल्ट फेसबुकमार्फत प्रतिक्रिया दिँदै उहाँले गौरीबहादुर कार्कीको संयोजकत्वमा बनेको आयोगको प्रतिवेदन अपूर्ण र प्रमाणविहीन रहेको उल्लेख गर्नुभएको छ। भाद्र २३ र २४ गतेका घटनालाई लिएर तयार गरिएको प्रतिवेदनका आधारमा आफूलाई अन्यायपूर्ण रूपमा नियन्त्रणमा राखिएको उहाँको भनाइ छ।

सर्वोच्च अदालतले परमादेश जारी गरेपछि सोमबार उहाँ रिहा हुनुभएको हो। लेखकले आफ्नो पक्षमा आवाज उठाउने नागरिकप्रति आभार व्यक्त गर्दै अदालतप्रति सम्मान प्रकट गर्नुभएको छ। साथै, कानुन र न्यायप्रति विश्वास रहेको उल्लेख गर्दै आगामी दिनमा कानुनी तथा राजनीतिक संघर्ष जारी रहने स्पष्ट पार्नुभएको छ।