काठमाडौं । नेपाल टेलिकमले मोबाइल सेवामा डाटा प्रयोगसम्बन्धी व्यवस्था परिमार्जन गर्दै ग्राहकलाई थप नियन्त्रण र सुविधा प्रदान गर्ने निर्णय गरेको छ। कम्पनीका अनुसार अब डाटा प्याकेज खरिद गरेका ग्राहकहरूले ‘प्याक नभएपछि स्वतः शुल्क लाग्ने सेवा’ आफूअनुकूल सक्रिय वा निष्क्रिय गर्न सक्नेछन्। यसका लागि ग्राहकले मोबाइलबाट ८४४४३ नम्बरमा फोन गरी सम्बन्धित विकल्प छनोट गर्न सक्ने व्यवस्था मिलाइएको छ।
यसअघि डाटा प्याकेजको भोल्युम वा समयावधि समाप्त भएपछि ग्राहकले डाटा प्रयोग जारी राखेमा मुख्य मौज्दातबाट शुल्क कट्ने व्यवस्था थियो। तर अब उक्त सेवा निष्क्रिय गरिएको अवस्थामा प्याकेज समाप्त भएपछि स्वतः शुल्क कट्ने छैन। प्याकेज बिना डाटा प्रयोग गर्न चाहने ग्राहकले भने यो सेवा सक्रिय राख्न सक्नेछन्।
नेपाल टेलिकमले डाटा प्रयोगबारे जानकारी गराउने प्रणालीमा पनि सुधार गरेको छ। अब ग्राहकको डाटा ९० प्रतिशत खपत भएपछि सूचना सन्देश पठाइनेछ। यसअघि ८० प्रतिशतमा सूचना दिने व्यवस्था रहेको थियो। कम्पनीले ग्राहकको मागअनुसार यस्तो परिवर्तन गरिएको जनाएको छ।
यस व्यवस्था नेपाल सरकार मन्त्रिपरिषद्को मिति २०८२ चैत १३ गतेको निर्णय तथा सञ्चार तथा सूचना प्रविधि मन्त्रालयको सुधारात्मक कार्ययोजनाअनुसार लागू गरिएको हो। उक्त कार्ययोजनामा स्वतः शुल्क लाग्ने सेवा निष्क्रिय गर्ने विकल्प उपलब्ध गराउने उल्लेख गरिएको थियो।
साथै, आगामी दिनमा यो सेवा नेपाल टेलिकमको मोबाइल अनुप्रयोगमार्फत पनि सक्रिय वा निष्क्रिय गर्न सकिने सुविधा क्रमशः उपलब्ध गराइने कम्पनीले जनाएको छ।
त्यसैगरी, ग्राहकको मागअनुसार प्रिपेड सेवामा २८ दिनको सट्टा ३० दिन समयावधि भएको नयाँ प्याकेज पनि सञ्चालनमा ल्याइएको छ। ‘प्रिपेड कम्बो २९९’ नामक उक्त प्याकेजमार्फत ग्राहकले ३०० मिनेट कल, ४ गिगाबाइट डाटा तथा कम्पनीभित्र २० वटा सन्देश पठाउन सक्नेछन्। कम्पनीले आगामी दिनमा ३० दिन अवधिका थप प्याकेजहरू पनि ल्याउने तयारी गरेको जनाएको छ।
सम्पादक:
लोकेन्द्र भण्डारी
समाचार संयोजक:
सुनिल आचार्य
रिपोर्टर:
अनिता बिष्ट
सरोज वोलखे
