३६ वर्षसम्म हत्कडी सुरक्षाकर्मीलाई लगाइदिएको रहेछ : गृहमन्त्री गुरुङ

काठमाडौँ । गृहमन्त्री सुधन गुरुङले विगत लामो समयसम्म सुरक्षाकर्मीलाई स्वतन्त्र रूपमा काम गर्न नदिएको संकेत गरेका छन्। उनका अनुसार करिब ३६ वर्षसम्म प्रहरीजस्ता निकायहरू विभिन्न दबाब र नियन्त्रणमा राखिएको जस्तो अवस्था थियो, जसका कारण उनीहरूले निष्पक्ष रूपमा आफ्नो जिम्मेवारी पूरा गर्न सकेनन्।

आइतबार बिहान सामाजिक सञ्जाल फेसबुकमार्फत उनले यस्तो धारणा सार्वजनिक गर्दै अब भने त्यस्तो अवस्था अन्त्य हुनुपर्ने बताएका छन्। गृहमन्त्री बनेपछि उनले प्रहरीलाई स्वतन्त्र रूपमा काम गर्न प्रोत्साहन दिएको र त्यसको असर पनि देखिन थालेको उल्लेख गरेका छन्।

पछिल्लो समय प्रहरी सक्रिय बन्दै ठूला भ्रष्टाचारसम्बन्धी मुद्दाहरू खोल्न थालेको छ। साथै, बिचौलिया, गुण्डागर्दी तथा गैरकानुनी गतिविधिमा संलग्न व्यक्तिहरूलाई पनि नियन्त्रणमा लिन थालेको छ।

गुरुङको भनाइ अनुसार, सुरक्षाकर्मीलाई कुनै दबाबबिना काम गर्न दिइयो भने मात्र देशमा कानुनको शासन मजबुत हुने र नागरिकले न्याय पाउने अवस्था सिर्जना हुन्छ।