भयरहित निर्वाचन गराउन सक्रिय हुन मुख्यमन्त्री शाहलाई देउवाको निर्देशन

काठमाडौं — नेपाली कांग्रेसका पूर्वसभापति एवं पूर्वप्रधानमन्त्री शेरबहादुर देउवाले आगामी निर्वाचनको सन्दर्भमा पहिलोपटक सार्वजनिक रूपमा धारणा व्यक्त गरेका छन्। भदौ २३ र २४ को जेन–जी आन्दोलनका क्रममा कुटपिटको घटनापछि मौन रहेका तथा पुस अन्त्यतिर विशेष महाधिवेशनमार्फत गगन थापा सभापतिमा निर्वाचित भई नेतृत्व परिवर्तन भएपछिसमेत सार्वजनिक प्रतिक्रिया नदिएका देउवाले निर्वाचनलाई लिएर मुख खोलेका हुन्।

पूर्वसभापति देउवाले सुदूरपश्चिम प्रदेशका मुख्यमन्त्री कमलबहादुर शाहलाई भयरहित वातावरणमा निर्वाचन सम्पन्न गराउन तथा कांग्रेस उम्मेदवारलाई विजयी बनाउन सक्रिय भूमिका निर्वाह गर्न आग्रह गरेका छन्। बुधबार महाराजगञ्जस्थित देउवाको निवासमा भएको भेटमा उनले यस्तो निर्देशन दिएको मुख्यमन्त्री शाहका प्रेस संयोजक डम्मर बमले जानकारी दिएका छन्।

भेटका क्रममा देउवाले नेपाली कांग्रेस लोकतन्त्रमा विश्वास गर्ने पार्टी भएकाले लोकतन्त्रको सुदृढीकरणका लागि निर्वाचनलाई स्वच्छ, निष्पक्ष र शान्तिपूर्ण बनाउन सबै नेता तथा कार्यकर्ता पूर्ण रूपमा समर्पित हुनुपर्ने बताएका थिए। ‘अहिलेको आवश्यकता भनेको भयरहित वातावरणमा निर्वाचन सम्पन्न गर्नु हो, त्यसका लागि कांग्रेसलाई विजयी बनाउन इमानदारीपूर्वक भूमिका निर्वाह गर्नुपर्छ,’ देउवाको भनाइ उद्धृत गर्दै प्रेस संयोजक बमले बताए।

कांग्रेसभित्र देउवा समूहले निर्वाचनमा सक्रियता नदेखाएको भन्दै काठमाडौंसहित विभिन्न स्थानबाट आलोचना भइरहेका बेला देउवाले निर्वाचनमा एकजुट भएर अघि बढ्न आह्वान गरेका छन्। सो भेटमा देउवाकी पत्नी तथा पूर्वपरराष्ट्रमन्त्री डा. आरजु राणा देउवासँग पनि छलफल भएको बताइएको छ।