घरेलु झगडाले रंगेलीमा भयावह घटना, श्रीमतीको हत्या गरेर पतिले गरे आत्महत्या

काठमाडौँ । मोरङको रंगेलीमा एक दुःखद घटना भएको छ। रंगेली नगरपालिका–५ बहुवनका २१ वर्षीय मुकेशकुमार मण्डलले आफ्नी पत्नीको हत्या गरेपछि आफूले पनि आत्महत्या गरेका छन्।

प्रहरीका अनुसार मुकेश सोमबार साँझ रंगेली–५ धनपट्टीस्थित आफ्नै ससुराली पुगेका थिए। त्यहाँ घरेलु विवाद भएपछि उनले २१ वर्षीया पत्नी अम्बिकाकुमारी मण्डलमाथि कुटपिट गर्दै चक्कुले प्रहार गरेका थिए। चक्कुको गम्भीर चोटका कारण अम्बिकाकुमारीको घटनास्थलमै मृत्यु भएको प्रहरीले जनाएको छ।

पत्नीको मृत्यु भएपछि मुकेशले सोही चक्कुले आफ्नै घाँटी रेटेर आत्महत्या गरेको प्रारम्भिक अनुसन्धानबाट खुलेको छ। घटनाबारे जानकारी पाउनासाथ प्रहरी टोली घटनास्थलमा पुगेर मुचुल्का उठाउनेलगायत कानुनी प्रक्रिया अघि बढाइरहेको छ।

इलाका प्रहरी कार्यालय रंगेलीका अनुसार घटनाको वास्तविक कारण र पृष्ठभूमिबारे थप अनुसन्धान भइरहेको छ। अनुसन्धान पूरा भएपछि मात्र घटनाको विस्तृत विवरण सार्वजनिक गरिने प्रहरीले जनाएको छ।