बैतडी निर्वाचन तयारी तीव्र, ३३ मतदानस्थल अतिसंवेदनशील सूचीमा

बैतडी । आगामी फागुन २१ गते हुने प्रतिनिधिसभा सदस्य निर्वाचनका लागि बैतडी जिल्लामा एक हजार चार सयभन्दा बढी कर्मचारी परिचालन गरिने भएको छ। जिल्ला निर्वाचन कार्यालयका अनुसार जिल्लाभर रहेका २१४ मतदान केन्द्रमा जम्मा एक हजार ४४२ जना कर्मचारी खटाइने तयारी गरिएको छ।

जिल्ला निर्वाचन कार्यालयका प्रमुख खगेन्द्र भारतीले निर्वाचनका लागि आवश्यक जनशक्ति व्यवस्थापन गर्न जिल्लास्थित विभिन्न सरकारी कार्यालयहरूसँग कर्मचारी विवरण माग गरिएको जानकारी दिए। उनले केही दिनभित्रै निर्वाचनमा खटिने कर्मचारीको विवरण सङ्कलन गरी खटनपटनको प्रक्रिया अघि बढाइने बताए।

एक मात्र निर्वाचन क्षेत्र रहेको बैतडीमा प्रतिनिधिसभा सदस्यका लागि ११ जनाको उम्मेदवारी कायम छ। जिल्लामा कुल एक लाख ५६ हजार ३७२ मतदाता रहेका छन्। तीमध्ये ७८ हजार ९८७ पुरुष, ७७ हजार ३८३ महिला र दुई जना अन्य मतदाता रहेको जिल्ला निर्वाचन कार्यालयले जनाएको छ।

निर्वाचन कार्यालयका सूचना अधिकारी नरेश दयालका अनुसार पाँच सयभन्दा बढी मतदाता भएका मतदान केन्द्रमा आठ जना र सोभन्दा कम मतदाता भएका केन्द्रमा सात जना कर्मचारी खटाइनेछ।

सुरक्षाका दृष्टिले जिल्लाका १२९ मतदानस्थलमध्ये ३३ स्थललाई अतिसंवेदनशील, २८ स्थललाई संवेदनशील र ६८ स्थललाई सामान्य श्रेणीमा वर्गीकरण गरिएको जिल्ला सुरक्षा समितिले जनाएको छ। निर्वाचनलाई शान्तिपूर्ण, निष्पक्ष र सुरक्षित बनाउन आवश्यक सुरक्षा व्यवस्था मिलाइने पनि जनाइएको छ।