राष्ट्रपति पौडेल आज जापान भ्रमणमा जाँदै

काठमाडौँ । राष्ट्रपति रामचन्द्र पौडेल आज जापानको औपचारिक भ्रमणमा जादैछन् । आजदेखि माघ २१ गतेसम्म राष्ट्रपति पौडेलले जापानको औपचारिक भ्रमण गर्ने परराष्ट्र मन्त्रालयले जानकारी दिएको छ । बिहीबार प्रधानमन्त्री निवास बालुवाटारमा बसेको मन्त्रिपरिषद् बैठकले राष्ट्रपतिको भ्रमण र उनको नेतृत्वमा रहने प्रतिनिधिमण्डललाई औपचारिक स्वीकृति प्रदान गरेको हो। राष्ट्रपति पौडेल माघ १८ देखि २१ गतेसम्म जापानमा रहने कार्यक्रम तय भएको छ। भ्रमणको प्रमुख उद्देश्य नेपाल–जापानबीच कूटनीतिक सम्बन्ध स्थापना भएको ७० औं वर्षगाँठको विशेष अवसरमा आयोजना हुने कार्यक्रमहरूमा सहभागिता जनाउनु रहेको छ।

भ्रमणका क्रममा राष्ट्रपति पौडेलले जापानी सम्राटसँग भेटघाट गर्ने साथै जापानका वरिष्ठ अधिकारीहरूसँग पनि औपचारिक छलफल गर्ने कार्यक्रम रहेको छ। नेपाल र जापानबीच कूटनीतिक सम्बन्ध सन् १९५६ सेप्टेम्बर १ मा स्थापना भएको थियो।

राष्ट्रपति पौडेलको भ्रमणले दुई देशबीचको राजनीतिक, सांस्कृतिक र आर्थिक सम्बन्ध अझ सुदृढ पार्ने विश्वास व्यक्त गरिएको छ।