कांग्रेसद्वारा निर्वाचन तयारी तीव्र, १२ समिति गठन गर्न परिपत्र

काठमाडौं । नेपाली कांग्रेसले फागुन २१ गते हुने निर्वाचनलाई व्यवस्थित, प्रभावकारी र अनुशासित ढंगले सञ्चालन गर्न पार्टीका मातहतका सबै संरचनालाई परिपत्र जारी गरेको छ। निर्वाचन परिचालन समिति संयोजक तथा उपसभापति विश्वप्रकाश शर्माद्वारा जारी परिपत्रमार्फत प्रदेश, जिल्ला र प्रतिनिधिसभा क्षेत्र कार्यसमितिलाई कम्तीमा १२ वटा समिति अनिवार्य रूपमा गठन गर्न निर्देशन दिइएको हो।

‘विजय अभियान व्यवस्थित बनाउन समिति र संरचना सबै तहमा अविलम्ब गठन गर्नु/गराउनुहुन्’ शीर्षकसहित जारी परिपत्रमा आम निर्वाचनमा पार्टी पंक्तिलाई योजनाबद्ध रूपमा परिचालन गर्न संरचनागत तयारी आवश्यक रहेको उल्लेख छ। केही स्थानमा समिति गठन भइसकेको र जहाँ गठन नभएको छ, त्यहाँ तत्काल गठन गर्न परिपत्र पठाइएको शर्माले स्पष्ट पारेका छन्।

परिपत्रअनुसार निर्वाचन व्यवस्थापन सचिवालय, निर्वाचन परिचालन मूल समिति, निर्वाचन प्रचार–प्रसार मूल समिति, स्थानीय तह समन्वय समिति, बौद्धिक क्षेत्र समन्वय समिति, सामाजिक संघ–संस्था समन्वय समिति, धार्मिक संघ–संस्था समन्वय समिति, निजी क्षेत्र समन्वय समिति, १८/३० विशेष अभियान समिति, पूर्वआप्रवासी समन्वय समिति, स्थानीय प्रशासन समन्वय समिति तथा अनुगमन समिति गठन गर्नुपर्नेछ।

यसका अतिरिक्त निर्वाचन परिचालन समिति र प्रचार–प्रसार समिति अन्तर्गत आवश्यक उपसमितिहरू पनि गठन गरी पार्टी संगठनलाई निर्वाचन केन्द्रित गतिविधिमा सक्रिय बनाइने परिपत्रमा उल्लेख छ।