सर्लाही–४ मा चुनावी अभियानसहित बागमती पुल नजिक गगन थापाको सार्वजनिक अन्तरक्रिया

काठमाडौँ । आसन्न प्रतिनिधिसभा निर्वाचनलाई लक्षित गर्दै नेपाली कांग्रेसका सभापति गगनकुमार थापा आज सर्लाही पुगेका छन्। सर्लाही–४ बाट उम्मेदवार रहेका थापा चुनावी प्रचारका क्रममा सिमरा हुँदै सर्लाही पुगेका हुन्।

थापाले माघ ६ गते प्रतिनिधिसभा निर्वाचनका लागि प्रतिनिधिमार्फत मनोनयन दर्ता गराएका थिए। मनोनयन दर्तापछि उनी पहिलो पटक आफ्नै निर्वाचन क्षेत्रमा पुगेका हुन्। निर्वाचन अभियानलाई तीव्र बनाउने उद्देश्यसहित उनले मतदातासँग प्रत्यक्ष भेटघाट र संवादलाई प्राथमिकतामा राखेका छन्।

आज सर्लाहीको कर्मैया क्षेत्रमा पर्ने बागमती पुल नजिक विशेष सार्वजनिक अन्तरक्रिया कार्यक्रम आयोजना गरिएको छ। उक्त कार्यक्रममा सभापति थापाले स्थानीय मतदातासँग प्रत्यक्ष संवाद गर्दै आफ्ना एजेण्डा, विकासका योजना र भावी कार्यदिशाबारे धारणा राख्ने कार्यक्रम रहेको छ।

निर्वाचन नजिकिँदै जाँदा प्रमुख दलका शीर्ष नेताहरू मैदानमा सक्रिय देखिन थालेका छन्। थापाको सर्लाही आगमनले सर्लाही–४ को चुनावी माहोल थप तातिने अपेक्षा गरिएको छ।