भद्रपुर विमानस्थलमा बुद्ध एयरको विमान धावनमार्गबाट चिप्लियो, सबै यात्रु सकुशल

काठमाडौँ, १८ पुस — झापाको भद्रपुर विमानस्थलमा बुद्ध एयरको विमान अवतरणका क्रममा धावनमार्गबाट चिप्लिएर दुर्घटनामा परेको छ। नेपाल नागरिक उड्डयन प्राधिकरणका अनुसार विमानमा सवार सबै यात्रु सकुशल रहेका छन् र घटनापछि तत्काल उद्धार कार्य सम्पन्न गरिएको छ।

नेपाल नागरिक उड्डयन प्राधिकरणका प्रवक्ता ज्ञानेन्द्र भुलका अनुसार ९एन–एमएफ कलसाइन भएको एटीआर–७२ विमानमा ५१ जना यात्रु सवार थिए। अवतरणको क्रममा रन–वेबाट चिप्लिएपछि विमान दुर्घटनामा परेको भए पनि मानवीय क्षति भने नभएको उनले जानकारी दिए।

बुद्ध एयरका प्रवक्ता दिपेन्द्र कर्णले अवतरणकै क्रममा धावनमार्ग चिप्लो भएका कारण विमान नियन्त्रण बाहिर गएको प्रारम्भिक जानकारी दिएका छन्। उनका अनुसार घटनाको विस्तृत प्राविधिक जाँचका लागि प्राविधिक टोली आजै काठमाडौंबाट भद्रपुर पठाइँदै छ।

घटनापछि विमानस्थल क्षेत्रमा सुरक्षाका आवश्यक सतर्कता अपनाइएको छ भने नागरिक उड्डयन प्राधिकरण र सम्बन्धित निकायले दुर्घटनाको कारणबारे थप अनुसन्धान अघि बढाएका छन्।