काठमाडौं— ट्रान्सपरेन्सी इन्टरनेशनल नेपालले महान्यायाधिवक्ता सविता भण्डारीलाई संस्थाको साधारण सदस्यसमेत नरहने गरी निलम्बन गरेको छ। सार्वजनिक पदमा पुगेपछि पछिल्लो समय विभिन्न विवादमा नाम जोडिन थालेको भन्दै संस्थाले उनलाई सदस्यताबाट निष्काशन गर्ने निर्णय गरेको हो।
ट्रान्सपरेन्सी इन्टरनेशनल नेपालका एक कार्यसमिति सदस्यका अनुसार उक्त निर्णय तत्काल लागू हुने गरी गरिएको छ। विवादमा नाम मुछिएपछि भण्डारीलाई पटक–पटक संस्थाबाट स्वेच्छिक राजीनामा दिन आग्रह गरिए पनि त्यसलाई बेवास्ता गरिएपछि बाध्य भएर निलम्बनको निर्णय लिनुपरेको ती सदस्यले बताए।
वरिष्ठ अधिवक्तासमेत रहेकी भण्डारी यसअघि ट्रान्सपरेन्सी इन्टरनेशनल नेपालको साधारण सदस्यका रूपमा आबद्ध थिइन्। उनले संस्थाको कार्यसमितिमा रहेर समेत विभिन्न अवधिमा जिम्मेवारी निर्वाह गरिसकेकी थिइन्।
संस्थाले आफ्नो मूल्य, सिद्धान्त र संस्थागत विश्वसनीयता कायम राख्न सार्वजनिक पदमा रहेका व्यक्तिको भूमिकालाई गम्भीरतापूर्वक मूल्याङ्कन गर्नुपर्ने आवश्यकता औँल्याउँदै उक्त कदम चालेको बताइएको छ।
सम्पादक:
लोकेन्द्र भण्डारी
समाचार संयोजक:
सुनिल आचार्य
रिपोर्टर:
अनिता बिष्ट
सरोज वोलखे
