एजेन्सी । फ्रान्सका राष्ट्रपति इमानुएल म्याक्रोन बिहीबार चीन पुगेका छन् । जहाँ उनले राष्ट्रपति सी जिनपिङसँग भेट गरेका छन् । म्याक्रोनको मुख्य उद्देश्य युक्रेन–रुस युद्ध रोक्न चीनले सहयोग गराओस् भन्ने सन्देश दिनु र दुबै देशबीचको व्यापारबारे कुरा गर्नु हो।
म्याक्रोन र उनकी श्रीमती ब्रिगिटलाई बेइजिङको ‘ग्रेट हल अफ द पिपल’ मा भव्य स्वागत गरिएको थियो। चिसो मौसमका कारण स्वागत समारोह भवनभित्रै गरिएको थियो। स्वागतका क्रममा स–साना बालबालिकाले फूल दिए र म्याक्रोनले उनीहरूलाई माया गर्दै अभिवादन गरे।
२०१७ मा राष्ट्रपति बनेपछि म्याक्रोनको यो चौथो चीन भ्रमण हो। उनले प्रधानमन्त्री ली छियाङसँग पनि भेट्ने छन्। यसअघि चीनले फ्रान्सलाई पाण्डा फिर्ता पठाएको विषयमा पनि दुबै पक्षबीच कुरा हुने अपेक्षा छ।
रुस–युक्रेन युद्ध चार वर्षमा पुग्दै गर्दा म्याक्रोन चीनले रुसलाई युद्ध रोक्न दबाब दिनु पर्ने पक्षमा छन्। उनले चीनजस्तो प्रभावशाली देशले पुटिनलाई युद्धविराममा सहमत गराउन भूमिका खेल्न सक्ने बताए।
चीनले सार्वजनिक रूपमा शान्ति वार्ताको पक्षमा कुरा गरे पनि रूसको आक्रमणबारे खुलेर आलोचना भने गरेको छैन। पश्चिमी देशहरूले चीनले रूसलाई आर्थिक र प्राविधिक सहयोग गरिरहेको आरोप लगाउँदै आएका छन्।
फ्रान्सले चीनलाई रुसलाई कुनै पनि तरिकाले सहयोग नगर्न आग्रह गर्ने बताएको छ। म्याक्रोनको यो चीन यात्रा युक्रेनी राष्ट्रपति जेलेन्स्कीको पेरिस भ्रमणपछि भएको हो, जहाँ जेलेन्स्कीले युरोपलाई युक्रेनको साथमा उभिन अपिल गरेका थिए।
सम्पादक:
लोकेन्द्र भण्डारी
समाचार संयोजक:
सुनिल आचार्य
रिपोर्टर:
अनिता बिष्ट
सरोज वोलखे
