काठमाडौँ — ‘जाग नेपाली’ नामक अभियानले इम्बोस्ड नम्बर प्लेटको नाममा नेपाली देवनागरी लिपि हटाउन खोजिएको भन्दै विरोध आन्दोलनको घोषणा गरेको छ।
आइतबार भृकुटीमण्डपस्थित रिपोर्टर्स क्लबमा आयोजित पत्रकार सम्मेलनमार्फत संयोजक डा. दीपेश केसीले देवनागरी लिपिमा आधारित नम्बर प्लेट प्रयोग नगर्ने सरकारी नीति नेपाली भाषा र पहिचानमाथिको हमला भएको दाबी गरे।
उनले भने, “दशैँको बेला पारेर जनता चाडपर्वमा व्यस्त हुँदा सडकमा प्रतिरोध नआओस् भनेर असोज १ गतेदेखि अनिवार्य इम्बोस्ड नम्बर प्लेट जडान गर्नुपर्ने भन्दै धम्की दिइएको छ।”
डा. केसीले इम्बोस्ड प्लेटको नाममा नेपालको १०–३० अर्बसम्मको रकम विदेशी कम्पनीले लैजाने दाबी गर्दै कमिसनको खेल भएको आरोप लगाए। उनले बङ्गलादेशजस्ता देशहरूले आफ्नै लिपिमा इम्बोस्ड प्लेट प्रयोग गरिरहँदा नेपालमा देवनागरी हटाउन खोजिएको बताए।
अभियानले नागरिकलाई देवनागरीको संरक्षणका लागि सडक आन्दोलनमा उत्रन आह्वान गरेको छ।
पत्रकार सम्मेलनमार्फत ९ र १० भदौमा राजनीतिक दल र संघसंस्थालाई ज्ञापनपत्र बुझाउने, ११ भदौमा परामर्श कार्यक्रम गर्ने र १३ भदौमा थप आन्दोलन कार्यक्रम सार्वजनिक गर्ने योजना समेत जानकारी गराइएको छ।
