आजको मौसम:मनसुन केही कमजोर भए पनि मध्यमदेखि भारी वर्षाको सम्भावना

काठमाडौँ, भदौ ४ — अहिले देशभर मनसुन केही कमजोर हुँदै गएको मौसम पूर्वानुमान महाशाखाले जनाएको छ। यद्यपि, बङ्गालको खाडीबाट अझै पनि पानीयुक्त हावा देशमा आइरहेको छ।

बुधबार दिउँसो लुम्बिनी, कर्णाली र सुदूरपश्चिम प्रदेशसँगै पहाडी भेगमा मौसम सामान्यतया बादल लाग्नेछ भने अन्य ठाउँमा आंशिक बादल रहनेछ। ती क्षेत्रका पहाडी भेगमा केही ठाउँ र तराईका एक–दुई स्थानमा मध्यम खालको वर्षा हुने सम्भावना छ।

आज राति कोशी, मधेश, बागमती र गण्डकी प्रदेशसँगै देशका पहाडी भागमा बादल लाग्नेछ। यी प्रदेशका केही पहाडी र तराई क्षेत्रहरूमा मध्यम वर्षा हुने अनुमान गरिएको छ। साथै, कोशी र गण्डकीका केही पहाडी ठाउँमा भारी वर्षा पनि हुनसक्नेछ।

महाशाखाले वर्षाका कारण पहाडमा पहिरो, माटो र ढुंगा बग्ने (डेब्रिज फ्लो) सम्भावना रहेको बताउँदै, खोला र नदीहरूमा पानीको सतह बढ्नसक्ने चेतावनी दिएको छ। यसले गर्दा यातायातसमेत प्रभावित हुन सक्ने भएकाले सबैलाई सतर्क रहन र आवश्यक तयारी गर्न अनुरोध गरिएको छ।