कामदार अलपत्र र अध्यक्ष भ्रमणबारेको समाचारप्रति नेपाल वायुसेवा निगमको स्पष्टिकरण

काठमाडौं – हालै केही सञ्चार माध्यममा सार्वजनिक भएको “कामदार अलपत्र र अध्यक्ष लिन हङकङ जहाज” भन्ने आशयको समाचारप्रति नेपाल वायुसेवा निगमले गम्भीर आपत्ति जनाउँदै स्पष्टिकरण जारी गरेको छ। निगमले सो समाचारलाई तथ्यहीन, भ्रामक र नियोजित दुष्प्रचारको रुपमा लिएको जनाएको छ।

निगमका अनुसार, काठमाडौं–हङकङ उडान नियमित तालिकाअनुसार नै भएको थियो र कार्यकारी अध्यक्ष युवराज अधिकारी नेतृत्वको टोलीको भ्रमण एक महिनाअघि नै स्वीकृत योजना अनुरूप सञ्चालन गरिएको थियो। उक्त भ्रमणको उद्देश्य उडान विस्तार, सेवा सुधार र सरोकारवालासँग प्रत्यक्ष छलफल गर्नु रहेको निगमले जनाएको छ।

दम्माम उडान रद्ध हुनुको कारण जहाजमा देखिएको आकस्मिक प्राविधिक समस्या रहेको र यात्रुहरूलाई अन्तर्राष्ट्रिय मापदण्ड अनुसार खानाबासको व्यवस्था गरिएको थियो। त्यस्तै, होल्ड भएका यात्रुहरूलाई अर्को दिन वैकल्पिक उडानबाट गन्तव्यमा पु¥याइएको थियो।

हङकङ भ्रमणको क्रममा ४३ औं वार्षिकोत्सवका अवसरमा आयोजित कार्यक्रममा निगम अध्यक्षसहितको टोलीले कार्गो ट्र्याकिङ प्रणाली, ढिलाइ समाधान, र वाइडबडी जहाजको प्रभावकारी प्रयोग लगायतका विषयमा सरोकारवालासँग छलफल गरेका थिए। भ्रमणमा सहभागी टोलीमा अध्यक्ष अधिकारीसँगै मार्केटिङ निर्देशक टंकनिधि दाहाल र वरिष्ठ पाइलट विजय लामा थिए।

निगमले भ्रमणको क्रममा अध्यक्ष अधिकारीले हङकङस्थित नेपाली साहित्यिक समूहद्वारा आयोजित कार्यक्रममा छोटो समयका लागि विदाको दिनमा सहभागिता जनाएका विषयलाई समेत तोडमोड गरी समाचार सम्प्रेषण गरिएको भन्दै आपत्ति जनाएको छ। निगमले यस्ता समाचारहरू प्रकाशन गर्नुअघि आधिकारिक प्रवक्तामार्फत् तथ्य यथार्थ पुष्टि गर्न सञ्चार माध्यमहरूलाई अनुरोधसमेत गरेको छ।