श्रावण आरम्भसँगै शिव मन्दिरमा भक्तजनको घुइँचो, देवघाटमा साउने मेलाको सुरुवात

काठमाडौं । ‘शिव महिना’ का रूपमा मानिने साउनको पहिलो दिन आज देशभरका शिव मन्दिरमा श्रद्धालुको उल्लेखनीय भीड देखिएको छ। श्रावण संक्रान्तिका अवसरमा विशेष रूपमा काठमाडौंस्थित पशुपतिनाथ मन्दिरमा विहानैदेखि भगवान् शिवको पूजाआराधनाका लागि हजारौँ भक्तजनको आगमन भएको छ।

साउन महिनालाई भगवान् शिवको आराधनाका लागि अत्यन्त पवित्र मानिन्छ। विशेषतः महिलाहरूले यस महिनाभर हरियो चुरा, माला र मेँहदी लगाउने, व्रत बस्ने जस्ता सांस्कृतिक तथा धार्मिक गतिविधिमा सक्रियता देखाउने परम्परा छ। यो महिनाको प्रारम्भसँगै शिवालयहरूमा दर्शनार्थीको भीड लाग्ने चलन रहिआएको छ।

यता, चितवनस्थित प्रमुख तीर्थस्थल देवघाटधाममा आजदेखि साउने मेला विधिवत् रूपमा सुरु भएको छ। विहानैदेखि भक्तजनहरू स्नान गरी शिवालयमा जल चढाउँदै आराधनामा लीन देखिएका छन्। साउन १ गतेदेखि शुरू हुने बोलबम मेला पनि आजैदेखि प्रारम्भ भएको हो।

देवघाट क्षेत्र विकास समितिका कार्यकारी निर्देशक सदन बरालका अनुसार साउन महिनाभर झण्डै पाँच लाख भक्तजन देवघाट मेला भर्न आउने अनुमान गरिएको छ। विशेषगरी सोमबारका दिन थप भिडभाड हुने देखिएकोले स्थानीय प्रशासन र सुरक्षा निकायको समन्वयमा सुरक्षात्मक तयारी मिलाइएको उनले जानकारी दिए।

श्रद्धालुहरू साउन महिनामा देवघाटमा स्नान गरी व्रत बसेर जल, बेलपत्र लगायतका सामग्रीबाट शिवजीको पूजा गरे मनोकांक्षा पूरा हुने धार्मिक विश्वास राख्छन्।