स्पेन भ्रमणमा गएर नफर्किएकाहरूको छानबिन गर्न गृहमन्त्रीको निर्देशन

काठमाडौँ — गृहमन्त्री रमेश लेखकले प्रधानमन्त्री केपी शर्मा ओलीको स्पेन भ्रमणमा सरकारी प्रतिनिधिमण्डल बाहेक गएका र नफर्किएका व्यक्तिहरुबारे निष्पक्ष छानबिन गर्न निर्देशन दिएका छन्। गृहमन्त्री लेखकले आज बिहान गृहसचिव गोकर्णमणि दुवाडी र प्रहरी महानिरीक्षक दीपक थापालाई उक्त विषयमा आवश्यक अनुसन्धान अघि बढाउन निर्देशन दिएका हुन्।

प्रधानमन्त्री ओली गत असार १४ गते स्पेन भ्रमणमा गएका थिए। उक्त भ्रमणका क्रममा सरकारी प्रतिनिधिमण्डलसँगै अन्य केही व्यक्ति पनि स्पेन गएका तर फर्किन बाँकी रहेको भन्ने चर्चा सार्वजनिक भएपछि सरकारले छानबिन गर्ने तयारी थालेको हो। गृहमन्त्री लेखकले यसबारे सत्य तथ्य सार्वजनिक गर्न पनि सम्बन्धित निकायलाई निर्देशन दिएका छन्।