शेखर समूहले अनुशासन समितिको एकतर्फी कारबाहीको विरुद्ध प्रतिवाद गर्ने

काठमाडौं ।  काठमाडौं। नेपाली कांग्रेसका नेता डा. शेखर कोइराला नेतृत्वको समूहले पार्टी अनुशासन समितिले गरेको एकतर्फी कारबाहीको विरोध गर्दै प्रतिकारात्मक कार्यक्रम बढाउने निर्णय गरेको छ। विशालनगर स्थित डा. कोइरालाको कार्यालयमा बसेको भेलाले केन्द्रीय अनुशासन समितिले पार्टी विधान उल्लंघन गरी नेताहरूमा कारबाही गरेको आरोप लगाएको छ।

भेलाले कारबाहीमा परेका नेताकार्यकर्ताहरूलाई न्याय दिलाउने, अन्याय नहुने गरी समाधान गर्ने निर्णय गरेको छ। साथै, पार्टी सभापति शेरबहादुर देउवालाई कारबाही प्रक्रिया रोक्न आग्रह गर्ने, राजनीतिक रूपमा प्रतिरोध जारी राख्ने र कारबाही नमान्ने नीति अपनाउने तय भएको डा. कोइरालाका सचिव दिनेश थपलियाले बताए।

उपसभापति धनराज गुरुङले सभापति देउवा, उपसभापतिहरू र महामन्त्रीहरूबीच अनुशासन समितिको फाइल अगाडि नबढाउने सहमति भएको दाबी गरे। तर, अनुशासन समितिका संयोजक आनन्द ढुङ्गानाले समितिमा छलफल नगरी एकतर्फी बिज्ञप्ति जारी गरेपछि यसको विरोध गर्ने निर्णय भएको थपलियाले जनाए।

यस भेलामा उपसभापति धनराज गुरुङ, सहमहामन्त्री जीवन परियार, नेता अर्जुननरसिंह केसी, बलबहादुर केसी, अनुशासन समिति सदस्य संजय गौतम लगायत केन्द्रीय सदस्यहरू उपस्थित थिए।