काठमाडौं, असार २१ – एसीसी यू–१६ इस्ट जोन कप क्रिकेट प्रतियोगिताको उपाधि नेपालले पुनः आफ्नो पोल्टामा पार्न सफल भएको छ। शनिबार भएको फाइनल खेलमा नेपालले सिंगापुरलाई २ विकेटले हराउँदै उपाधि रक्षा गरेको हो।
सिंगापुरले दिएको ११४ रनको लक्ष्य नेपालले २९ ओभरमै ८ विकेटको क्षतिमा पूरा गर्यो। नेपालका जोय थापा २४ रनमा अविजित रहँदै नायक बने, जसले अन्तिम क्षणमा अभय यादवसँग मिलेर टोलीलाई जित दिलाए। अभयले विजयी छक्का प्रहार गरेका थिए।
शिवांश बजगाईंले २० रनको योगदान दिएका थिए। एक समय ४०–१ को बलियो स्थितिमा रहेको नेपालले लगातार विकेट गुमाउँदा ५८–५ को संकटमा परेको थियो। त्यसपछि जोय र शुभम खनालले महत्वपूर्ण साझेदारी गर्दै टिमलाई सम्हाले। शुभमले १६ रन बनाएपछि नेपाल ९२–८ को अवस्थामा पुगेको थियो।
बलिङतर्फ सिंगापुरका कपिश भेनकटरमनले ४ विकेट लिए पनि टोलीलाई जित दिलाउन सकेनन्। युवान पाण्डेले २ तथा आकाश तेजा र वेदांश गुप्ताले १–१ विकेट लिए।
त्यसअघि टस जितेर पहिले ब्याटिङ गरेको सिंगापुर ४०.५ ओभरमा ११३ रनमा अलआउट भएको थियो। रोहन अस्टिनले सर्वाधिक २३ रन बनाउँदा रिहान नाइकले १५ रनको योगदान दिए।
नेपालका लागि अभय यादवले उत्कृष्ट प्रदर्शन गर्दै १० ओभरमा ३४ रन खर्चिएर ३ विकेट लिए। सुशिल बहादुर रावलले पनि ३ विकेट हात पारे। शुभम खनालले २ र कप्तान बिपिन प्रसाद शर्माले १ विकेट लिएका थिए।
नेपाल प्रतियोगिता भरि अपराजित रह्यो र समूह चरणमै सिंगापुरलाई पराजित गरिसकेको थियो। नेपालले यसअघि २०२३ को संस्करण पनि जितेको थियो। त्यसअघि एसीसीले आयोजना गर्ने ‘यू–१६ इस्टर्न रिजन’ मा नेपालले सन् २०१७ र २०१९ मा पनि लगातार उपाधि जितेको थियो।
सम्पादक:
लोकेन्द्र भण्डारी
समाचार संयोजक:
सुनिल आचार्य
रिपोर्टर:
अनिता बिष्ट
सरोज वोलखे
