पत्रकार दिलभुषण पाठकविरुद्ध पक्राउ पुर्जी जारी

काठमाडौँ — वरिष्ठ पत्रकार दिलभुषण पाठकविरुद्ध नेपाल प्रहरीको साइबर ब्युरोले पक्राउ पुर्जी जारी गरेको छ। एक व्यक्तिले साइबर अपराध सम्बन्धी उजुरी दिएपछि ब्युरोले गोप्य रूपमा अदालतबाट अनुमति लिँदै पक्राउ पुर्जी लिएको हो।  पाठकविरुद्ध कसले, के आरोपमा उजुरी हालेको भन्नेबारे केही बताएको छैन ।

पत्रकार पाठकले आफ्नो युट्युब च्यानल “टफ टक” अन्तर्गत “टफ एक्स्प्लेनर” कार्यक्रममार्फत नक्सालस्थित पाँचतारे होटल हिल्टनको खरिद, त्यसमा शंकर ग्रुपको लगानी र जयवीर देउवाको संलग्नता तथा सम्पत्ति विस्तारसम्बन्धी विषयमा रिपोर्ट प्रसारण गरेका थिए। उनले जयवीरको रियलस्टेट व्यवसाय दुबई, अष्ट्रेलिया हुँदै क्यानडासम्म फैलिएको दाबी गरेका थिए।

यसअघि, शंकर ग्रुपले वैशाख २१ गते विज्ञप्ति जारी गर्दै उक्त दावीको खण्डन गरेको थियो र त्यसबिरुद्ध कानुनी कदम चाल्ने चेतावनी दिएको थियो। सोही सन्दर्भमा साइबर ब्युरोमा उजुरी दर्ता गरिएपछि पाठकविरुद्ध कानुनी प्रक्रिया अघि बढाइएको हो।

प्रहरीले यसलाई ‘साइबर अपराध’ अन्तर्गतको मुद्दा मानेर अघि बढाएको बताइएको छ। यस घटनाले अभिव्यक्ति स्वतन्त्रता, प्रेस स्वतन्त्रता र सञ्चारमाध्यमको भूमिकामाथि बहस सिर्जना गरेको छ।