५७ आधारभूत अस्पताल साउनदेखि सञ्चालनमा ल्याउने तयारी

काठमाडौँ, जेठ २२ — स्वास्थ्य तथा जनसंख्या मन्त्री प्रदीप पौडेलले निर्माण सम्पन्न भएर सञ्चालनमा नआएका ५७ वटा आधारभूत अस्पताल आगामी साउनदेखि सञ्चालनमा ल्याउने तयारी अघि बढाएका छन्। स्रोत अभावका कारण बन्द रहेका अस्पताललाई सञ्चालनमा ल्याउन मन्त्रालय सक्रिय बनेको हो।

ती अस्पतालहरू पाँच, १० र १५ शय्याका रहेका छन्, जुन स्थानीय तहमा निर्माण भए पनि मापदण्ड, जनशक्ति र स्रोतको कमीका कारण सञ्चालनमा आउन सकेका थिएनन्। यस्तै अस्पताल आगामी आर्थिक वर्षमा थप निर्माण गर्ने योजना पनि मन्त्रालयको रहेको छ।

मन्त्रालयले हालै “आधारभूत अस्पताल सञ्चालन मापदण्ड २०८२” तयार गरिसकेको छ। यस मापदण्डका आधारमा संघ सरकारले जनशक्ति, औजार, औषधी, र अन्य आवश्यक सामग्रीहरूको व्यवस्थापन गर्नेछ।

योजनालाई कार्यान्वयन गर्न मन्त्री पौडेलले मन्त्रालयका नीति, योजना तथा अनुगमन महाशाखा प्रमुख डा. कृष्णप्रसाद पौडेलको संयोजकत्वमा कार्यदल गठन गरेका छन्। कार्यदलले संघ, प्रदेश र स्थानीय तहबीचको समन्वय, जिम्मेवारी र स्रोत व्यवस्थापनको स्पष्टता ल्याउनेछ।

मन्त्रालयका प्रवक्ता डा. प्रकाश बुढाथोकीका अनुसार, आगामी वर्षका लागि करिब एक अर्ब रुपैयाँ बजेट छुट्याइएको छ, जसले अस्पताल सञ्चालन सहज बनाउने अपेक्षा गरिएको छ।