रविलाई रुपन्देही जिल्ला अदालतमा उपस्थित गराइँदै , आजै थुनामा पठाइने

काठमाडौँ, २५ चैत । राष्ट्रिय स्वतन्त्र पार्टी (रास्वपा) का सभापति रवि लामिछानेलाई आज अदालतमा उपस्थित गराइने भएको छ। बुटवलको सुप्रिम बचत तथा सहकारी प्रकरणमा पक्राउ परेका लामिछानेलाई कारागार पठाउने प्रक्रिया पूरा गर्नका लागि अदालतमा उपस्थित गराउने तयारी गरिएको हो।

शुक्रबार काठमाडौंबाट पक्राउ परेका लामिछानेलाई शनिबार बिहान यति एयरलाइन्सको विमानमार्फत भैरहवा लगिएको थियो। तर शनिबार र आइतबार सार्वजनिक बिदा भएका कारण उनलाई आज मात्रै रुपन्देही जिल्ला अदालतमा उपस्थित गराइने भएको हो।

सुप्रिम सहकारी ठगी र संगठित अपराधका मुद्दामा जिल्ला अदालत रुपन्देहीको आदेश उल्टाउँदै उच्च अदालतले शुक्रबार लामिछानेलाई थुनामा पठाउने आदेश दिएको थियो। यसअघि जिल्ला अदालतले लामिछानेलाई १ करोड धरौटीमा छुट्न आदेश दिएको थियो, जुन आदेशलाई लामिछानेले चुनौती दिँदै उच्च अदालतमा साधारण तारेखमा छुट्ने माग राखेका थिए। न्यायाधीशद्वय रमेश ढकाल र स्वीकृति पराजुलीले लामिछानेलाई थुनामा पठाउने आदेश गरेका थिए।