चाडपर्वमा खाद्य आपूर्ति सुनिश्चित गर्न प्रधानमन्त्री ओलीको निर्देशन

काठमाडौं– प्रधानमन्त्री केपी शर्मा ओलीले दसैँ, तिहार लगायतका महत्वपूर्ण चाडपर्वका समयमा खाद्य वस्तुको सहज आपूर्ति सुनिश्चित गर्न उद्योग, वाणिज्य तथा आपूर्ति मन्त्रालय र मातहतका निकायलाई विशेष निर्देशन दिएका छन्।

आईतबार प्रधानमन्त्री तथा मन्त्रिपरिषद्को कार्यालय, सिंहदरबारमा आयोजित छलफलमा प्रधानमन्त्री ओलीले खाद्य वस्तुको कृत्रिम अभाव सृजना गर्ने, र नाफा र स्वार्थलाई प्राथमिकता दिने प्रवृत्तिसँग सम्झौता नगर्नका लागि स्पष्ट निर्देशन दिएका छन्।

प्रधानमन्त्री ओलीले भने, “चिनीलगायतका सामानमा कालोबजारी गरेर बढी नाफा लिने प्रवृत्ति देखिन्छ भने, त्यस्तो गर्ने व्यापारीलाई व्यापार गर्न नदिएर साल्ट ट्रेडिङलाई जिम्मेवारी दिन सकिन्छ। यस्ता विषयमा कुनै सम्झौता हुँदैन, कुनै भनसुन चल्दैन।”

कार्यक्रममा उद्योगमन्त्री दामोदर भण्डारी, मुख्यसचिव एकनारायण अर्याल र अन्य सचिवहरू उपस्थित थिए। छलफलमा प्रधानमन्त्री ओलीले समग्रमा आयात घटाउने र निर्यात बढाउने, साथै विषादीयुक्त खाद्य पदार्थको आयात–निर्यात नगर्नको आग्रह पनि गरे।

नेपालमा फलाम, युरेनियम आदि खानीजन्य पदार्थको उत्खनन जारी रहेको भएपनि, तिनलाई कच्चा पदार्थको रूपमा बिक्री गर्न र वितरण नगरी, उद्योग सञ्चालन र सामग्री उत्पादनमा प्राथमिकता दिने अपिल गरेका छन्।

साथै, प्रधानमन्त्री ओलीले त्रिभुवन अन्तर्राष्ट्रिय विमानस्थलस्थित नेपाल आयल निगमको भण्डारण र थानकोटको डिपोलाई जोखिमयुक्त स्थानबाट बस्ती कम भएको स्थानमा स्थानान्तरण गर्न पनि निर्देशन दिएका छन्।

यसरी, प्रधानमन्त्री ओलीले खाद्य वस्तुको आपूर्तिमा कुनै किसिमको अनियमितता नहोस् र चाडपर्वको समयमा सहज आपूर्ति सुनिश्चित गर्न उच्च प्राथमिकता दिएको बताएका छन्।