नेपालगञ्जमा लगाइएको कर्फ्यू आंशिक रूपमा हट्यो

काठमाडौँ  , १८ असोज  |  नेपालगञ्जमा लगाइएको कर्फ्यू बिहिबार बिहानदेखि आंशिक रूपमा हटाइएको छ । मङ्गलवार दिउँसो १ बजेबाट लगाइएको कर्फ्यु बिहीबार बिहान ८ बजेबाट १२ घण्टाका लागि हटाएको छ ।  त्यसपछि बेलुकी ८ देखि शुक्रबार बिहान ६ बजेसम्म भने पुनः कर्फ्यू लाग्ने बाँकेका प्रमुख जिल्ला अधिकारी विपिन आचार्यले जानकारी दिए ।

कर्फ्यु हटाइएको अवधिमा कुनै पनि किसिमका सभा बैठक वा प्रदर्शन गर्न, पोष्टर–पम्प्लेट टाँस्न र हुलदंगा वा अशान्ति मच्चाउने उद्देश्यले एकै ठाउँमा पाँचजनाभन्दा बढी जम्मा हुन नपाउनेगरी निषेधाज्ञा जारी गरिएको छ ।

अधिकारी वीपीन आचार्यले जिल्लामा समग्र शान्ति सुव्यवस्था कायम गर्न, सार्वजनिक सम्पत्तिको संरक्षण, सामाजिक सद्भाव कायम गर्न तथा मानव अधिकारको सम्मान गर्न आग्रहसमेत गर्नुभएको छ ।