काठमाडौं । नेपाल विद्युत् व्यवसायी महासंघले ‘फिन इलेक्ट्रो टेक-२०२२’ प्रदर्शनी मेला सुरु गरेको छ । विद्युत् तथा विद्युतीय सामग्रीको व्यवसाय विकास र विद्युतीय क्षेत्रको आन्तरिक र अन्तर्राष्ट्रिय व्यापारको सहजीकरणका लागि बिहीबारदेखि काठमाडौंको भृकुटीमण्डपको प्रदर्शनी हलमा मेला सुरु गरेको हो ।
इलेक्ट्रिक तथा इलेक्ट्रोनिक्स सामग्रीको अन्तर्राष्ट्रिय स्तरको बृहत् प्रदर्शनी एवं गोष्ठीको दशौं संस्करण ‘नेपालको समृद्धि ऊर्जा खपत अभिवृद्धि’ नाराका साथ सरु भएको छ । स्वदेशमा उत्पादित विद्युत्को खपत बढाउन र देशलाई आर्थिक रूपमा सबल बनाउन ऊर्जा तथा विद्युतीय व्यवसायीको समग्र विकास तथा व्यापार प्रवद्र्धनमा अत्यधिक टेवा पुर्याउने उद्देश्यले प्रर्दशनी सुरु गरिएको हो ।
राष्ट्रिय एवं अन्तर्राष्ट्रिय इलेक्ट्रिक, इलेक्ट्रोनिक्स, सञ्चार एवं सूचना प्रविधि तथा विद्युतीय एवं वैकल्पिक ऊर्जा उद्यमीलाई एकै स्थानमा जमघट गराई व्यावसायिक प्रवद्र्धन गर्न प्रदर्शनी आयोजना गरिएको महासंघले जनाएको छ । साथै, प्रदर्शनीको उद्योगमा भएका नवीनतम् उपलब्धिबारे सूचना आदानप्रदान गर्ने तथा उपभोक्तावर्गमा ऊर्जाको व्यवस्थित खपतको महत्वबारे जानकारी अद्यावधिक गराउन सहयोग पुर्याउने लक्ष्य छ ।
उद्योगी, व्यवसायी एंव उद्यमीमाझ अनुकूल व्यावसायिक वातावरणको सम्भावनालाई प्रस्तुत गर्नुका साथै उपभोक्ता हकहितसम्बन्धी जन चेतनामूलक कार्यक्रम प्रदर्शनी अवधिभरि सञ्चालन गरिने छ ।
प्रदर्शनी हलभित्र ४९ वटा ब्लक र हलबाहिर २६ वटा स्टल गरी जम्मा ७५ वटा प्याभिलियन तथा स्टल रहेका छन् जसमा नेपाली उत्पादन लगायत बहुराष्ट्रिय कम्पनीको उत्पादन, ट्रान्समिसन तथा डिस्ट्रिब्युसन सामग्री, ऊर्जा आपूर्ति तथा नियन्त्रण यन्त्र, हाउस वायरिङ सामग्री, वायर, केबुल एवं कन्डक्टर, अत्याधुनिक प्रकारका स्विच, एलिडी लाइटिङ, इलेक्ट्रोनिक्स उपकरण, घरेलु विद्युतीय उपकरण, कार्यालय प्रविधि, बहुसञ्चार उपकरण, सूचना प्रविधि, वैकल्पिक ऊर्जा तथा अन्य विद्युतीय सामग्रीको प्रदर्शन गरिने भएको छ ।
प्रदर्शनीमा अधिकांश सहभागी संस्थाले उपभोक्तासँग प्रत्यक्ष अन्तरक्रिया गरी आफ्ना उत्पादनबारे जानकारी दिनेछन् भने अवलोकन कर्ताको सहजता तथा खरिद गर्न रुचाउने आगन्तुकका लागि छुट्टै सेल्स एरियाको व्यवस्था गरिएको छ ।
स्वदेशी उत्पादनलगायत भारत, जापान, सिंगापुर, ताइवान, चीन, फ्रान्स, स्पेन, मलेसिया, अमेरिका, जर्मनी, इटाली, अस्ट्रेलिया, आदिका विभिन्न इलेक्ट्रिक तथा इलेक्ट्रोनिक्ससम्बन्धी उत्पादनहरू प्रदर्शनमा छन् । यस इलेक्ट्रो टेकको यस १०औं संस्करणमा राठी, अन्नपूणर्, महालक्ष्मी, ग्रेटह्वाइट, एचपीएल, इलेक्ट्रा इलेक्ट्रिक, जानकी, लिशा, ट्रान्सवेल्ड, ओपल, लेकिसे, स्नाइडर, लिग्राण्ड, सि एण्ड एस, फिलिप्स, बजाज, हेभल्स, सिस्का, सिमेन्स, क्रम्टन, उषा, एंकर, ओरियन्ट, हिमेल, चिन्ट, हिमस्टारलगाएतका स्वदेशी तथा विदेशी ब्रान्डको सहभागिता रहने छ ।
प्रदर्शनीलाई सहभागीमूलक एवं सूचनामूलक बनाउन विभिन्न विषयमा गोष्ठी, कार्यपत्र प्रस्तुति तथा अन्तक्र्रिया कार्यक्रम सञ्चालन हुनेछन् । चार दिनसम्म चल्ने प्रर्दशनीमा देश भित्र तथा बाहिरबाट आमन्त्रित अतिथि, उद्योगी व्यवसायी, सरकारका उच्च अधिकारी, आर्किटेक्चर, इलेक्ट्रिकल इन्जिनियर, इन्टेरियर डेकोरेटर, प्राविधिककर्मी, नेपाल भरका विद्युतीय व्यवसायीहरू, मिडियाकर्मी, विद्यार्थी एवं आमसर्वसाधारण गरी ६० हजारभन्दा बढी आगन्तुकले अवलोकन गर्ने विश्वास लिइएको छ ।
सम्पादक:
लोकेन्द्र भण्डारी
समाचार संयोजक:
सुनिल आचार्य
रिपोर्टर:
अनिता बिष्ट
सरोज वोलखे
