एसिया कप: बंगलादेशसँग भारत ६ रनले पराजित

काठमाडौँ, ३० भाद्र ।  एसिया कप २०२३ को सुपर फोर राउण्डको अन्तिम खेलमा टीम इन्डियाले हार बेहोरेको छ । बंगलादेशले भारतलाई ६ रनले हरायो । जारी एसिया कपमा भारतको यो पहिलो हार हो । यद्यपि, प्रतियोगिताको दृष्टिकोणले यो खेलको कुनै महत्त्व थिएन र टीम इन्डियाले सेप्टेम्बर १७ मा श्रीलंकासँग फाइनल खेल्नेछ। यससँगै बंगलादेशको यात्रा पनि यो जितसँगै टुंगिएको छ ।

पहिले ब्याटिङ गरेको बंगलादेशले आठ विकेट गुमाएर २६५ रन बनाएको थियो । कप्तान शकिब अल हसनले सर्वाधिक ८० रनको योगदान दिए । तौहिद हृदयोयले ५४ र नसुम अहमदले ४४ रन बनाए । भारतका लागि शार्दुल ठाकुरले तीन र मोहम्मद शामीले दुई विकेट लिए । प्रसिद, अक्षर र जडेजाले समान एक एक विकेट लिए ।

२६६ रनको लक्ष्य पछ्याएको भारतीय टोलीले सबै १० विकेट गुमाएर २५९ रन मात्रै बनाउन सकेको थियो । शुभमन गिलले १२१ रनको शानदार इनिङ खेले पनि कसैको साथ पाएनन् । ४२ रन बनाएका अक्षर दोस्रो उत्कृष्ट स्कोरर बने । बंगलादेशका लागि मुस्ताफिजुर रहमानले ३ विकेट लिए । महेदी हसन र तन्जिम हसनले २–२ विकेट लिए । साकिब र मेहदीले एक एक विकेट लिए ।

बंगलादेशको इनिङ्समा के भयो ?
कप्तान शकिब अल हसन (८०) र तौहीद हृदय (५४) को मद्दतमा बंगलादेशले शुक्रबार ओडीआई एसिया कपको सुपर–४ खेलमा भारतविरुद्ध ८ विकेटमा २६५ रन जोडेको छ । शकिबले ८५ बलमा ६ चौका र तीन छक्का प्रहार गरे भने तौहिदले ८१ बलमा ५४ रन बनाएर कप्तानलाई राम्रो साथ दिए । यी दुईबीच पाँचौं विकेटका लागि १०१ रनको साझेदारी भयो ।

शाकिबले लेफ्ट हार्म स्पिनर अक्षर पटेलको बलमा लगातार दुई छक्का प्रहार गरे । बंगलादेशका लागि नसुम अहमद (४४) र मेहदी हसन (अनटआउट २९) ले पनि महत्वपूर्ण योगदान दिए । भारतका लागि शार्दुल ठाकुरले तीन र मोहम्मद शामीले दुई विकेट लिए । प्रसिद्ध कृष्ण, अक्षर पटेल र रविन्द्र जडेजाले एक एक विकेट लिए । अनुभवी बलर मोहम्मद शामीले नयाँ बलमा उत्कृष्ट प्रदर्शन गरे । उनले तेस्रो ओभरमा लिटन दासलाई क्लिन बोल्ड गरे । यसबाहेक ६५ ​​रन दिएर तीन विकेट लिने शार्दुल ठाकुरले रन खर्च गरे पनि सर्वाधिक विकेट लिन सफल भए । तर, यदि भारतीय फिल्डर सूर्यकुमार, तिलक र केएल राहुलले तीनवटा क्याच नछाडेको भए बंगलादेश पहिले आउट हुन सक्ने थियो।

भारतको इनिङ्समा के भयो ?
२६६ रनको लक्ष्य पछ्याएको भारतको सुरुवात निकै खराब रह्यो । कप्तान रोहित शर्मा खाता नखोल्दै तनजिम हसनको शिकार बने । आफ्नो अर्को ओभरमा तन्जिमले तिलक वर्मालाई पनि करियरको पहिलो एकदिवसीय खेलमा पाँच रन बनाएर प्याभिलियन पठाए। १७ रनमा दुई विकेट गुमाएपछि भारतीय टोली समस्यामा परेको थियो । राहुलले गिलसँग अर्धशतकीय साझेदारी गर्दै भारतीय इनिङ्सको कब्जामा लिए तर उनलाई महेदी हसनले १९ रनको व्यक्तिगत स्कोरमा प्याभेलियन पठाए । इशान किशन पनि पाँच रन बनाएर मेहदी हसनको शिकार बने । यसैबीच गिलले ६१ बलमा अर्धशतक पूरा गरे । भारतले ९४ रनमा चार विकेट गुमाएपछि सूर्यकुमार र गिलले साझेदारी गर्दै भारतको स्कोर १०० रनभन्दा माथि पुर्‍याए र आशा जगाए तर २६ रनको स्कोरमा शकिबले सूर्यलाई बोल्ड गरेपछि टीम इन्डिया समस्यामा परेको थियो ।

आधा टोली १३९ रनमा प्याभेलियन फर्किएपछि भारतलाई जित दिलाउने जिम्मेवारी गिलको काँधमा थियो । उनले छिटो रन बनाउन थाले र भारतको स्कोर १५० रनभन्दा माथि पुर्याए । तर, यसैबीच जडेजा ७ रन बनाएर आउट भए । गिल एक छेउमा अडिए र ११७ बलमा शतक पूरा गरे । शतक पूरा गरेपछि उनले छिटो रन बनाउन थाले र भारतीय टोली खेलमा फर्कियो। गिल र अक्षरले मिलेर भारतको स्कोर २०० रनभन्दा माथि पुर्याएका थिए । तर, ठूलो शट खेल्ने प्रयासमा गिलले आफ्नो विकेट महेदी हसनलाई दिए । उनले १३३ बलमा आठ चौका र पाँच छक्का प्रहार गर्दै १२१ रन बनाए ।

गिल आउट भएपछि भारतको हार निश्चित थियो तर अक्षरले यसपछि तीव्र गतिमा रन बनाउन थाले । अर्को छेउमा शार्दुल ११ रन बनाएर आउट भए । अक्षरले ठूला शट खेल्न जारी राख्दै भारतको स्कोर २५० रनभन्दा माथि पुर्याए । तर, उनी ४९ औं ओभरमा ३४ बलमा ४२ रन बनाएर आउट भए । योसँगै भारतको हार निश्चित थियो । अन्तिम ओभरको पाँचौं बलमा शमी रनआउट भए र भारतीय इनिङ्स एक बल बाँकी रहँदा २५९ रनमा सिमित भयो।

जडेजा कपिलपछि २ हजार रन र २०० विकेट लिने दोस्रो भारतीय बनेका छन् ।
अलराउन्डर रविन्द्र जडेजा एकदिवसीय अन्तर्राष्ट्रिय क्रिकेटमा २,००० भन्दा बढी रन र २०० भन्दा बढी विकेट लिने भारतका दोस्रो र विश्वको १४औँ क्रिकेटर बनेका छन्। आफ्नो १८२औँ खेल खेल्दै जडेजाले बंगलादेशविरुद्धको एसिया कप खेलमा शमीम हुसेनलाई आउट गरेर एकदिवसीय क्रिकेटमा आफ्नो २०० विकेट पूरा गरेका थिए। क्रिकेटको यो फर्म्याटमा उनको नाममा २५७८ रन छन् । जडेजाअघि यो उपलब्धि भारतका महान अलराउन्डर कपिल देवले गरेका थिए । उनले २२५ खेलमा ३ हजार ७८३ रन बनाउनुका साथै २५३ विकेट पनि लिएका छन् ।

२०० विकेट लिने सातौं भारतीय बलर
जडेजा एकदिवसीय क्रिकेटमा २०० विकेट लिने सातौं भारतीय बलर बनेका छन् । उनीभन्दा अगाडि अनिल कुम्बले (३३४ विकेट), जवागल श्रीनाथ (३१५), अजित आगरकर (२८८), जहीर खान (२६९), हरभजन सिंह (२६५) र कपिल देव (२५३) ले यो माइलस्टोन पुगेका थिए।