श्रीमानले बँदेल धपाउन थापेको पासोमा परेर श्रीमतीको मृत्यु

काठमाडौँ । गुल्मीको धुर्कोट गाउँपालिका–५ मन्टारीमा जङ्गली जनावर धपाउन बारीमा राखिएको विद्युतीय पासोमा परेर ६० वर्षीया हुमकला भण्डारीको मृत्यु भएको छ। उहाँ गए राति करिब १:३० बजे करेन्ट लागेर गम्भीर घाइते हुनुभएको थियो। उपचारका लागि तत्काल गुल्मी अस्पताल तम्घास लगिए पनि चिकित्सकले उहाँलाई मृत घोषणा गरेका छन्। प्रहरीले दिएको जानकारीअनुसार भण्डारीका श्रीमान् भेषराज भण्डारीले बँदेलबाट बाली जोगाउन घरदेखि करिब १५० मिटर टाढाको बारीमा बिजुलीको पोलबाट करेन्ट प्रवाह गरी विद्युतीय पासो थाप्नुभएको थियो।

घटनापछि प्रहरीले उहाँलाई नियन्त्रणमा लिएको छ। घटनाको कारण र अन्य विवरण पत्ता लगाउन प्रहरी टोलीले घटनास्थल पुगेर थप अनुसन्धान गरिरहेको छ। स्थानीयलाई यस्ता जोखिमपूर्ण उपाय अपनाउन नदिन पनि प्रहरीले आग्रह गरेको छ।