पानी समस्त जीवहरूको प्राण रक्षाका लागि प्रकृतिले दिएको वरदान हो:राष्ट्रपति

काठमाडौँ, ८ चैत । राष्ट्रपति रामचन्द्र पौडेलले पानीका स्रोतको संरक्षण गर्नु मानव सभ्यताका लागि चुनौती बनेको बताएका छन्।

विश्व पानी दिवस (मार्च २२) को अवसरमा शुभकामना दिँदै उनले शहरी क्षेत्रमा निर्माण गरिएका पक्की संरचनाका कारण जमिनमुनिको पानीको सतह निरन्तर घट्ने क्रम जारी रहँदा चुनौती सृजना भएको बताएका छन्।

‘पानी भनेको समस्त जीवहरूको प्राण रक्षा गर्ने प्रकृतिले दिएको वरदान हो। प्राणी र पृथ्वीको अस्तित्व पानीसँग गाँसिएको छ’, उनको सन्देशमा उल्लेख छ, ‘बढ्दो शहरीकरण तथा भौतिक पूर्वाधार निर्माणका क्रममा भएको वनजंगल तथा प्रकृति विनाशका कारण पानीका स्रोत नष्ट भइरहेको तीतो यथार्थ हाम्रा सामु विद्यमान छ। साथै, शहरी क्षेत्रमा निर्माण गरिएका पक्की संरचनाका कारण जमिनमुनिको पानीको सतह निरन्तर घट्नेक्रम जारी छ जसले यस क्षेत्रमा थप चुनौती सृजना गरेको छ।’

उनले भूमिगत पानीको स्रोतमा कमी हुन नदिन जलाधार क्षेत्र र गाँउ–गाँउमा रहेका आहाल, पोखरी, तालतलैया संरक्षण गर्न जरुरी रहेको बताएका छन्। त्यस्तै, शहरी क्षेत्रमा वर्षात्‌को पानीमार्फत भूमिगत पानी स्रोत बढाउन पूर्वाधार निर्माण गर्दा सम्बद्ध सबै पक्षले ध्यान दिन जरुरी रहेको उनको भनाइ छ।

‘यत्रतत्र पोखरीहरू निर्माण गरी आकाशे पानी संकलन समेत गरी पानीका स्रोतहरूको संरक्षण गर्न अति आवश्यक भइसकेको छ’, राष्ट्रपति पौडेलको सन्देशमा उल्लेख छ।