फुटेको हाँडी जोड्ने प्रयास असफलता लुकाउने खेल हो : गोकुल बास्कोटा

काठमाडौँ । नेकपा एमालेका नेता गोकुल प्रसाद बास्कोटाले कम्युनिष्ट पार्टीहरूबीच फेरि एकताको चर्चा भइरहेका बेला त्यसप्रति असन्तुष्टि जनाएका छन्। उनले पार्टी फुटाएर अहिले फेरि जोड्ने प्रयास गर्नु आफ्ना विगतका गल्ती लुकाउने र नेतृत्वमा टिकिरहने रणनीति मात्र भएको टिप्पणी गरेका छन्।

सामाजिक सञ्जाल फेसबुकमार्फत उनले पार्टी एकताको कुरा मात्रै गरेर समस्या समाधान नहुने बताएका छन्। उनका अनुसार यदि साँच्चिकै सुधार र एकता चाहिएको हो भने पहिले पार्टी फुटाउनु गल्ती थियो भनेर स्वीकार गर्नुपर्छ। साथै, आफूभन्दा नयाँ पुस्ता वा सहकर्मीलाई नेतृत्वको अवसर दिन पनि तयार हुनुपर्ने उनको भनाइ छ।

बास्कोटाको यो प्रतिक्रिया आइतबार नेकपा र एमालेका शीर्ष नेताहरूबीच पार्टी एकता वा कार्यगत एकताको सम्भावनाबारे सार्वजनिक रूपमा छलफल भएको भोलिपल्ट आएको हो। उनले अहिले भइरहेको एकताको चर्चा व्यवहारमा भन्दा पनि राजनीतिक स्वार्थका लागि अघि बढाइएको प्रयासजस्तो देखिएको संकेत गरेका छन्।