काठमाडौँ उपत्यकामा भोलि सार्वजनिक विदा

काठमाडौँ, १० असोज । काठमाडौँ उपत्यकामा बिहीबार (भोलि) सार्वजनिक विदा हुने भएको छ ।

सरकारले इन्द्रजात्राको अवसरमा असोज ११ गते, बिहीबार काठमाडौँ उपत्यकामा सार्वजनिक विदा दिएको हो ।

नेवार समुदायले मनाउने इन्द्रजात्राका लागि भोलि काठमाडौँ, ललितपुर र भक्तपुरमा सार्वजनिक विदा हुने भएको हो । उपत्यका विदामा सरकारी कार्यालय, बैंक, विद्यालय, नेप्से तथा सेयर बजार बन्द हुनेछ ।

वर्षा र सहकालका देवता देवराज इन्द्रको पूजा–आराधना गरी यो पर्व मनाइन्छ । यो पर्व काठमाडौँ, ललितपुर, भक्तपुर, धुलिखेल, दोलखालगायत स्थानमा मनाउने प्रचलन छ । भाद्र शुक्ल द्वादशीका दिन हनुमानढोका अगाडि धार्मिक विधिपूर्वक इन्द्रध्वजासहितको लिङ्गो ठड्याइएपछि प्रारम्भ हुने यो जात्रा प्रत्येक वर्ष भाद्र शुक्ल चतुर्दशीका दिन पर्छ ।