काठमाडौं, २९ नोभेम्बर २०२४ – लेकहेड युनिभर्सिटी, क्यानाडाले काठमाडौंमा एजेन्ट वर्कशपको सफल आयोजना गर्यो। नेपाली शैक्षिक परामर्शदाता र प्रतिनिधिहरूको उपस्थितिमा सम्पन्न उक्त कार्यक्रमले अन्तर्राष्ट्रिय शिक्षाको प्रवर्द्धनका लागि रणनीति र जानकारी आदानप्रदान गर्ने अवसर प्रदान गर्यो।
कार्यक्रममा लेकहेड युनिभर्सिटीका अन्तर्राष्ट्रिय उप-प्रोभोस्ट (कार्यवाहक) तथा इन्टरनेशनल इन्रोलमेन्ट निर्देशक रोबर्ट पेरीयर र दक्षिण एसियाका क्षेत्रीय प्रबन्धक गरिमा नारंग प्रमुख रूपमा उपस्थित थिए।
कार्यक्रममा नेपाली विद्यार्थीहरूका लागि विश्वविद्यालयका भर्ना मापदण्ड, शैक्षिक कार्यक्रमहरू, र सहयोग सेवाबारे महत्त्वपूर्ण जानकारी प्रदान गरियो। सहभागीहरूले विश्वविद्यालयले उपलब्ध गराउने छात्रवृत्ति अवसर, लचिलो भर्ना प्रक्रिया, र विद्यार्थीहरूको सफलताका लागि बनाइएका विशेष सहयोग प्रणालीहरूको बारेमा जानकारी प्राप्त गरे।
कार्यक्रमका अन्तर्गत लेकहेड युनिभर्सिटीका प्रतिनिधि र नेपाली शैक्षिक परामर्शदाताबीच खुलेर छलफल भयो। लेकहेड युनिभर्सिटीका तर्फबाट सहभागी परामर्शदाताहरूलाई प्रशंसा पत्र वितरण गरी सम्मान गरिएको थियो। “हामी नेपाली एजेन्टहरूसँग भएको यो छलफल र सहकार्यबाट उत्साहित छौं।
नेपाल हामीका लागि महत्त्वपूर्ण क्षेत्र हो, र यो वर्कशपले विद्यार्थीहरूको शैक्षिक यात्रामा हाम्रो प्रतिबद्धता झल्काउँछ,” रोबर्ट पेरीयरले भने। कार्यक्रममा सहभागीहरूले विश्वविद्यालयका शैक्षिक अवसर र सहयोग प्रणालीबारे पाएको जानकारीलाई सकारात्मक रूपमा लिएका थिए।
गरिमा नारंगले भनिन्, “नेपाली विद्यार्थीहरूलाई उच्च शिक्षा प्राप्त गराउनका लागि हामी यहाँका परामर्शदाताहरूसँगको सहकार्यलाई महत्त्वपूर्ण मान्छौं।” यो वर्कशपले लेकहेड युनिभर्सिटीलाई नेपाली विद्यार्थीहरूको लागि उच्च शिक्षाका लागि उत्कृष्ट गन्तव्यका रूपमा अझ मजबुत बनाएको छ।
सम्पादक:
लोकेन्द्र भण्डारी
समाचार संयोजक:
सुनिल आचार्य
रिपोर्टर:
अनिता बिष्ट
सरोज वोलखे
