रास्वपालाई प्रचण्डले भने- हारभन्दा जित धान्न गाह्रो हुन्छ

काठमाडौं । नेकपाका अध्यक्ष प्रचण्डले संसद्मा बोल्दै अहिले धेरै सिट जितेको दललाई आफ्नो पुरानो अनुभवबाट सिक्न आग्रह गरेका छन्। उनले २०६४ सालको चुनावपछि आफ्नो पार्टी पनि अहिले रास्वपाजस्तै धेरै मत ल्याएर शक्तिशाली बनेको तर पछि जनताको विश्वास जोगाउन नसकेको बताएका हुन्।

मंगलबार प्रतिनिधिसभा बैठकमा बोल्दै उनले जितपछि जिम्मेवारी झन् बढ्ने र जनताको भरोसा टिकाइराख्न गाह्रो हुने बताए। उनले भने, “हारभन्दा जितलाई सम्हाल्न गाह्रो हुन्छ। हामी पनि एक समय तपाईंहरूजस्तै बलियो अवस्थामा थियौँ, तर आफ्नै कमजोरीका कारण जनताको विश्वास जोगाउन सकेनौँ। संख्या र जनसमर्थन सधैँ एउटै रहँदैन।”

प्रचण्डले संसद् भवन केवल इँटा र सिमेन्टले मात्रै नभई हजारौँ सहिदको बलिदान र संघर्षबाट बनेको प्रतीक भएको बताए। उनले अहिले संसद्मा महिला, दलित, आदिवासी, मधेशी, मुस्लिम, थारू लगायत विभिन्न समुदायको प्रतिनिधित्व हुनु ठूलो उपलब्धि भएको उल्लेख गरे।

उनले संघीय लोकतान्त्रिक गणतन्त्रपछि सबै समुदायको सहभागिता बढेको भन्दै यसलाई आफ्नो पार्टीको चुनावी जितभन्दा पनि ठूलो सफलता माने। प्रचण्डले सबै दललाई निषेध, अपमान र प्रतिशोधको राजनीति नगरी सहकार्य र विश्वासका साथ अघि बढ्न आग्रह गर्दै जनताले दिएको जिम्मेवारी पूरा गर्न सुझाव दिए।