बढ्दो साइबर र अन्तर्राष्ट्रिय अपराधले समाज जटिल बन्दै:आईजीपी कार्की

काठमाडौँ। नेपाल प्रहरीका प्रमुख प्रहरी महानिरीक्षक (आईजीपी) दानबहादुर कार्कीले परम्परागत अपराधसँगै सङ्गठित, साइबर तथा अन्तर्राष्ट्रिय प्रकृतिका अपराध बढ्दै जाँदा मुलुक र समाज झन् जटिल बन्दै गएको बताउनुभएको छ। आइतबार काठमाडौँमा आयोजित नेपाल प्रहरी रणनीतिक सम्मेलन–२०८२ को उद्घाटन समारोहमा बोल्दै उहाँले प्रविधिको तीव्र प्रयोगसँगै विकसित नयाँ किसिमका अपराध नियन्त्रण गर्न रणनीतिक छलफल अपरिहार्य बनेको उल्लेख गर्नुभयो।

आईजीपी कार्कीले बदलिँदो अपराध प्रवृत्तिका कारण सुरक्षामा थप चुनौती देखिएको भन्दै यस्ता सम्मेलनले अपराध रोकथाम र नियन्त्रणका उपाय पहिचान गर्न महत्वपूर्ण योगदान पुर्‍याउने विश्वास व्यक्त गर्नुभयो। सम्मेलनमा परम्परागत अपराधदेखि साइबर र अन्तर्राष्ट्रिय अपराधसम्मका विषयमा गहन छलफल हुने उहाँको भनाइ थियो।

समाजमा देखिएका विविध किसिमका अपराध नियन्त्रणका लागि विषयविज्ञको सुझाव र अनुभवलाई नीतिगत तथा कार्यान्वयन तहमा उपयोग गर्न सम्मेलन आयोजना गरिएको आईजीपी कार्कीले स्पष्ट पार्नुभयो। उहाँले नेपाल प्रहरीको मूलमन्त्र ‘सत्य, सेवा, सुरक्षा’ रहेको उल्लेख गर्दै सम्पूर्ण प्रहरी कर्मचारीले यसलाई व्यवहारमा आत्मसात् गर्नुपर्नेमा जोड दिनुभयो।

संविधान, प्रहरी ऐन तथा प्रचलित कानुनले तोकेको जिम्मेवारीअनुसार नेपाल प्रहरीले शान्ति, सुरक्षा र सुव्यवस्था कायम राख्ने, कानुनको प्रभावकारी कार्यान्वयन गर्ने, अपराध रोकथाम तथा अनुसन्धान गर्ने र मानव अधिकारको संरक्षण गर्दै जनउत्तरदायी तथा व्यावसायिक सेवा प्रवाह गर्नुपर्ने दायित्व रहेको उहाँले स्मरण गराउनुभयो। जिम्मेवारीको दायरा विस्तारसँगै प्रहरीप्रतिको जनअपेक्षा पनि बढ्दै गएको उहाँको भनाइ थियो।

दुई दिनसम्म चल्ने नेपाल प्रहरी रणनीतिक सम्मेलन–२०८२ ले ‘जेन–जी’ प्रदर्शनका कारण भौतिक तथा मानसिक रूपमा चुनौतीमा परेका प्रहरी कर्मचारीको मनोबल अभिवृद्धि गर्न सहयोग पुर्‍याउने अपेक्षा गरिएको छ।