अमेरिकी अदालतमा उपस्थित भए मादुरो, सबै आरोप अस्वीकार

काठमाडौँ । भेनेजुएलाका अपदस्थ राष्ट्रपति निकोलस मादुरोलाई पहिलोपटक अमेरिकाको अदालतमा उपस्थित गराइएको छ। अमेरिकाले उनलाई लागूऔषध तस्करी र ‘नार्को–टेररिज्म’ अर्थात् लागूपदार्थ र आतंकवादसँग जोडिएका गम्भीर आरोप लगाएको छ। तर अदालतमा मादुरोले सबै आरोप अस्वीकार गर्दै आफू निर्दोष रहेको बताएका छन्।

बीबीसीका अनुसार न्यूयोर्कको अदालतमा उपस्थित हुँदा मादुरोले “म निर्दोष छु, म अझै पनि आफ्नो देशको राष्ट्रपति हुँ” भन्दै दाबी गरेका थिए। अदालतले उनको मुद्दामा अर्को सुनुवाइ मार्च १७ मा हुने जनाएको छ।

यसैबीच, मादुरोको पक्राउपछि भेनेजुएलामा राजनीतिक हलचल बढेको छ। मादुरोको रिहाइको माग गर्दै सुरु भएको संसद् सत्रमा डेल्सी रोड्रिगेजले अन्तरिम राष्ट्रपतिको रूपमा शपथ लिएकी छिन्। २०१८ देखि उपराष्ट्रपति रहेकी ५६ वर्षीया रोड्रिगेजले अमेरिकी सेनाले मादुरो र उनकी श्रीमती सिलिया फ्लोरेसलाई पक्राउ गरेको घटनालाई ‘अपहरण’ भन्दै दुख व्यक्त गरिन्।

मादुरो पक्राउ परेपछि संयुक्त राष्ट्रसंघमा पनि चर्को बहस भयो। भेनेजुएलाका राजदूत स्यामुएल मोनकाडाले कुनै कानुनी आधारबिनै आफ्नो देशमाथि सशस्त्र आक्रमण भएको आरोप लगाए। तर संयुक्त राष्ट्रसंघका लागि अमेरिकी राजदूत माइक वाल्ट्जले मादुरोलाई “अवैध राष्ट्रपति” भन्दै उनलाई पक्राउ गर्नु सही कदम भएको बताए। उनले विश्वकै ठूलो ऊर्जा स्रोत भएको देशलाई “न्यायबाट भागेको नेता” को हातमा छोड्न नसकिने जिकिर गरे।

अमेरिकाले मादुरोमाथि लागूऔषध तस्करी, आतंकवादसँग जोडिएको षड्यन्त्र, कोकेन आयात, र मेसिन गन तथा विनाशकारी हतियार राख्ने षड्यन्त्र जस्ता गम्भीर आरोप लगाएको छ।