टेरामक्स भ्रष्टाचार मुद्दामा पूर्वमन्त्री बस्नेतसहित १६ जनामाथि सुनुवाइ हुँदै

काठमाडौँ ।  टेरामक्स प्रविधि खरिदसम्बन्धी भ्रष्टाचार मुद्दामा पूर्वमन्त्री मोहनबहादुर बस्नेतसहित १६ जनामाथि आज पनि विशेष अदालतमा सुनुवाइ हुँदैछ। अदालतले मुद्दालाई ‘हेर्दाहेर्दै’ अवस्थामा राखेको छ। अख्तियार दुरुपयोग अनुसन्धान आयोगले उनीहरूविरुद्ध ३ अर्ब ५१ करोड रुपैयाँ बिगो माग गरेको छ।

बस्नेतमाथि आवश्यक अध्ययन बिना नै टेरामक्स प्रणाली खरिद गर्ने निर्णय गरेको आरोप छ। नेपाल दूरसञ्चार प्राधिकरणका तत्कालीन अध्यक्ष दिगम्बर झासहित अन्य पदाधिकारीले कानुनी आधार नभएको अवस्थामा निर्णय गरेको दाबी छ।

सर्वोच्च अदालतले पहिले नै अनुमति बिना कल विवरणमा पहुँच नदिन आदेश दिएको भए पनि त्यसको उल्लङ्घन भएको आरोप छ। अख्तियारले निर्णय प्रक्रियामा मिलेमतो र दबाब प्रयोग भएको भन्दै मुद्दा अघि बढाएको छ।