को-को छन् प्रधानन्यायाधीशको दौडमा ?

काठमाडौँ । प्रधानमन्त्री बालेन्द्र शाह ले आज साँझ ५ बजे संवैधानिक परिषद्को बैठक बोलाएका छन् । नयाँ अध्यादेश जारी भएपछि रोकिएको संवैधानिक नियुक्ति प्रक्रिया अघि बढाउन बैठक राखिएको हो ।

बैठकमा विशेषगरी नयाँ प्रधान न्यायाधीश सिफारिस गर्ने विषय मुख्य एजेन्डा रहने बताइएको छ । सर्वोच्च अदालतमा प्रधान न्यायाधीश पद खाली भएपछि अहिले कामु प्रधान न्यायाधीशका रूपमा सपना प्रधान मल्लले अदालतको नेतृत्व गरिरहेकी छन् ।

प्रधानमन्त्रीको सचिवालयका अनुसार न्यायपालिकाको नेतृत्व छिट्टै टुंग्याउन आवश्यक भएकाले परिषद् बैठक बोलाइएको हो । प्रधानमन्त्रीका प्रेस विज्ञ दीपा दाहालले पनि संवैधानिक जिम्मेवारीअनुसार प्रक्रिया अघि बढाउन बैठक महत्वपूर्ण हुने बताएकी छन् ।

यसअघि न्याय परिषद् सचिवालयले प्रधान न्यायाधीश बन्न योग्य ६ जना न्यायाधीशको नाम संवैधानिक परिषद्मा पठाइसकेको छ । सूचीमा सपना प्रधान मल्ल, कुमार रेग्मी, हरिप्रसाद फुयाँल, मनोजकुमार शर्मा, नहकुल सुवेदी र तिलप्रसाद श्रेष्ठ रहेका छन् ।

अहिलेसम्मको परम्परा अनुसार वरिष्ठताका आधारमा सपना प्रधान मल्लको नाम सिफारिस हुने सम्भावना बढी देखिएको छ । तर परिषद्ले फरक निर्णय गरेमा अन्य पाँच जनामध्येबाट पनि नयाँ प्रधान न्यायाधीश सिफारिस हुन सक्नेछ ।