नवनिर्वाचित प्रतिनिधिसभा सदस्यको शपथ आज दिउँसो २ बजे

काठमाडौं । प्रतिनिधिसभाका नयाँ निर्वाचित सांसदहरूले आज दिउँसो २ बजे पद तथा गोपनीयताको शपथ लिने भएका छन्। सङ्घीय संसद् सचिवालयले शपथ कार्यक्रमका सबै तयारी पूरा भइसकेको जनाएको छ।

शपथ ज्येष्ठ सदस्य अर्जुननरसिंह केसी ले गराउनेछन् । उनलाई यसअघि रामचन्द्र पौडेल ले शपथ गराइसकेका छन्। कार्यक्रम सिंहदरबारमा रहेको नयाँ बहुउद्देश्यीय हलमा हुनेछ। यसपटक ४७ जना सांसदले नेपाली बाहेकका भाषामा शपथ लिने तयारी गरेका छन्, जसमध्ये १७ जनाले मैथिली भाषामा शपथ लिनेछन्।

संविधान र कानुन अनुसार सांसदहरूले शपथ लिनुपर्ने व्यवस्था छ। सचिवालयले सबै सांसदलाई आवश्यक कागजातसहित तोकिएको समयभन्दा २ घण्टा अगाडि नै उपस्थित हुन आग्रह गरेको छ। साथै, औपचारिक वा आफ्नो सांस्कृतिक पहिचान झल्किने पोसाकमा आउन पनि भनिएको छ।