बंगलादेशका प्रधानमन्त्री तारिकले आज शपथ लिँदै

एजेन्सी। बंगलादेशका नेता तारिक रहमान आज बंगलादेशका नयाँ प्रधानमन्त्रीका रूपमा शपथ ग्रहण गर्दैछन्। अपराह्न ढाकामा आयोजना हुने विशेष समारोहमा उनले पद तथा गोपनीयताको शपथ लिने कार्यक्रम तय भएको छ।

हालै सम्पन्न संसदीय निर्वाचनमा बंगलादेश नेसनलिस्ट पार्टी (बीएनपी) ले स्पष्ट बहुमत हासिल गरेपछि रहमानलाई प्रधानमन्त्रीको जिम्मेवारी दिन सहमति बनेको हो। निर्वाचनपछि बनेको नयाँ राजनीतिक समीकरणसँगै आज शपथ ग्रहण हुँदै बंगलादेशमा नयाँ सरकार औपचारिक रूपमा सुरु हुन लागेको हो।

शपथ समारोह राजधानी ढाकामा हुनेछ। कार्यक्रममा स्वदेशी नेताहरूका साथै छिमेकी तथा मित्र राष्ट्रका प्रतिनिधिहरूको पनि उपस्थिति रहने बताइएको छ। नयाँ प्रधानमन्त्री रहमानले शपथपछि राष्ट्रका नाममा सम्बोधन गर्दै सरकारको प्राथमिकता सार्वजनिक गर्ने अपेक्षा गरिएको छ। बीबीसीका अनुसार प्रधानमन्त्री र मन्त्रिपरिषद् सदस्यहरूको शपथ ग्रहण समारोह अपराह्न ४ बजेका लागि तय गरिएको छ ।

साधारण नागरिकका लागि यो परिवर्तन महत्वपूर्ण मानिएको छ। रोजगारी, अर्थतन्त्र सुधार, मूल्यवृद्धि नियन्त्रण, स्वास्थ्य र शिक्षा क्षेत्रमा सुधारजस्ता विषयमा नयाँ सरकारले के–कस्ता कदम चाल्छ भन्नेमा जनताको चासो छ।

नयाँ सरकार गठनसँगै बंगलादेशमा राजनीतिक स्थिरता कायम हुने र जनजीवन सहज बन्दै जाने अपेक्षा गरिएको छ।