निर्वाचन सुरक्षा: भोलिदेखि नै सेना परिचालन

काठमाडौँ । सरकारले आउँदो फागुन २१ गते हुने प्रतिनिधिसभा निर्वाचनलाई सुरक्षित बनाउन भोलि बुधबारदेखि नेपाली सेना परिचालन गर्ने भएको छ। निर्वाचनको मिति नजिकिँदै गएपछि सुरक्षालाई बलियो बनाउने उद्देश्यले मतदानको करिब एक महिनाअघि नै सेना खटाउन लागिएको हो।

मन्त्रिपरिषद्को सिफारिसमा राष्ट्रपति रामचन्द्र पौडेलले यसअघि नै नेपाली सेना परिचालन गर्न स्वीकृति दिनुभएको थियो। त्यसपछि सेनाले निर्वाचनका लागि विशेष सुरक्षा योजना बनाउने, तालिम दिने र अभ्यास गर्ने काम गरिसकेको छ। गृह मन्त्रालयको संयोजनमा तयार गरिएको ‘एकीकृत निर्वाचन सुरक्षा योजना, २०८२’ अनुसार अब देशभर सेना खटाइनेछ।

सरकारले यस निर्वाचनका लागि करिब ७९ हजारभन्दा बढी नेपाली सेना परिचालन गर्ने निर्णय गरेको छ। सेना मतदानस्थल वरिपरि मात्र नभई अहिले सशस्त्र प्रहरीले सुरक्षा दिइरहेका सार्वजनिक भवन, कारागार र अन्य संवेदनशील स्थानमा पनि खटिनेछन्। निर्वाचनमा सशस्त्र प्रहरी र नेपाल प्रहरी पनि परिचालन हुनेछन्।

सरकारका अनुसार सबै सुरक्षा निकायबीच समन्वय गरेर निर्वाचन शान्तिपूर्ण, निष्पक्ष र सुरक्षित रूपमा सम्पन्न गराउने तयारी गरिएको छ।