आज माघ शुक्ल पूर्णिमा , स्वस्थानी व्रत विधिपूर्वक सम्पन्न गरिँदै

काठमाडौँ– आज माघ शुक्ल पूर्णिमाको दिन एक महिना लामो स्वस्थानी व्रत कथा विधिपूर्वक समापन हुँदैछ। पौष शुक्ल पूर्णिमादेखि सुरु गरिएको यो व्रत वैदिक सनातन हिन्दू धर्म मान्नेहरूले घरघरमा श्रद्धापूर्वक गर्दै आएका हुन्।

एक महिनासम्म भक्तजनले दैनिक रूपमा पार्वतीसहित भगवान् शिवको पूजा गरेका थिए। साथै, स्कन्द पुराणअन्तर्गत पर्ने केदारखण्डको माघ माहात्म्यमा आधारित स्वस्थानी व्रत कथा सुन्ने र सुनाउने परम्परा पनि आजकै दिन टुंगिन्छ।

व्रत पूरा गरेका भक्तजनले आज १०८ जनै, सुपारी, पान, फूल, रोटी, अक्षता, विभिन्न फलफूल, धुप, बत्ती र नैवेद्य चढाएर देवी स्वस्थानीलाई अघ्र्य दिने गर्छन्। यसपछि चढाइएको प्रसाद पति, छोरा वा नजिकका आफन्तलाई बाँड्ने र केही प्रसाद पवित्र नदीमा बगाउने चलन छ।

आजको दिन फलाहार गरेर रातभर जाग्राम बस्ने र देवीको कथा सुन्ने–सुनाउने परम्परा पनि रहेको छ। यस्तो गरे मनोकामना पूरा हुन्छ भन्ने विश्वास छ।

स्वस्थानीको अर्थ आफू बसेको स्थानकी देवी भन्ने हो। ध्यान, साधना र आत्मशुद्धिका लागि उत्तरायणपछि यो समय उपयुक्त मानिन्छ। विधिपूर्वक स्वस्थानी व्रत गरे रोग निको हुने, छुट्टिएका जोडी मिल्ने र मनले चाहेको कुरा पूरा हुने धार्मिक विश्वास रहेको छ।