विदेशस्थित नेपाली युवाबाट एमाले कार्यालय पुनःनिर्माणको अभियान

काठमाडौँ । जेन–जी आन्दोलनका क्रममा तोडफोड र आगजनीबाट क्षति पुगेको नेकपा (एमाले) केन्द्रीय कार्यालयको पुनःनिर्माण कार्य विदेशमा रहेका नेपाली युवाहरूले गर्ने भएका छन्। पार्टी कार्यालयको पुनःनिर्माणका लागि करिब १० करोड रुपैयाँ खर्च लाग्ने अनुमान गरिएको छ, जसको लागत पूर्ण रूपमा विदेशस्थित युवाहरूले जुटाउने घोषणा गरेका छन्।

एमालेले तोडफोड र आगलागीबाट क्षतिग्रस्त भवनलाई पुनःनिर्माण गरी पुनः पार्टी कार्यालयको रूपमा सञ्चालन गर्ने निर्णय गरेसँगै विभिन्न मुलुकमा रहेका युवाहरूले टेलिफोन र सामाजिक सञ्जालमार्फत ‘कार्यालय हामी बनाइदिन्छौं’ भन्ने प्रतिबद्धता जनाएका हुन्।

पार्टी स्रोतका अनुसार, यस पुनःनिर्माण पहललाई एमाले अध्यक्ष केपी शर्मा ओलीले “देशभक्ति र पार्टीप्रतिको समर्पणको प्रेरणादायी उदाहरण” भन्दै धन्यवाद दिएका छन्। उनका अनुसार, विदेशमा रहेका युवाहरूको आर्थिक तथा प्राविधिक सहयोगले पुनःनिर्माण कार्यमा गतिशीलता आउने विश्वास गरिएको छ।

यो अभियानको समन्वय ‘अर्गनाइजेशन अफ नेपाली फ्रेन्ड्स’ (ONF) ले गर्नेछ। संस्थाले विश्वका विभिन्न मुलुकमा रहेका नेपाली युवाहरूसँग समन्वय गर्दै आर्थिक सहयोग, डिजाइन, प्राविधिक परामर्श र निर्माण व्यवस्थापनमा सहकार्य गर्ने योजना बनाएको जनाएको छ।

एमाले पार्टी कार्यालय धुम्बाराहीस्थित भवन गत भदौमा भएको जेन–जी आन्दोलनका क्रममा आगजनी र तोडफोडबाट क्षतिग्रस्त भएको थियो। पुनःनिर्माण कार्य पूरा भएपछि भवनलाई आधुनिक सुविधासहितको ‘स्मार्ट पार्टी मुख्यालय’को रूपमा सञ्चालन गर्ने तयारी भइरहेको पार्टी स्रोतले जनाएको छ।