काठमाडौं । प्रधानमन्त्री सुशीला कार्की र प्रधानसेनापति अशोकराज सिग्देलबीच सिंहदरबारमा विशेष भेटवार्ता भएको छ। प्रधानमन्त्री तथा मन्त्रिपरिषद्को कार्यालयमा मंगलबार भएको भेटवार्तामा देशको पछिल्लो शान्ति–सुरक्षाको अवस्था, राजनीतिक स्थायित्व र सुरक्षा संयन्त्र सुदृढीकरणबारे गम्भीर छलफल भएको सरकारी स्रोतले जनाएको छ।
प्रधानमन्त्री कार्कीले भदौ २३ र २४ गतेको जेन–जी आन्दोलनका क्रममा तत्कालीन प्रधानमन्त्री केपी शर्मा ओलीको सरकार पतन भएपछि सत्तारोहण गरेकी थिइन्। आन्दोलनका मागअनुसार नेपाली सेनाको पहलमा कार्की नेतृत्वमा अन्तरिम सरकार गठन भएको थियो। यस कारण, प्रधानमन्त्री बनेको केही दिनमै प्रधानसेनापतिसँग भएको भेटवार्ताले राजनीतिक तथा सुरक्षा वृतमा विशेष ध्यान आकर्षित गरेको छ।
भेटवार्तामा मुलुकको आन्तरिक स्थायित्व कायम गर्न सेनाको भूमिका, आन्दोलनपछि उत्पन्न सुरक्षा चुनौती समाधान गर्ने उपाय र कानून–व्यवस्था सुदृढ पार्ने विषयमा पनि छलफल भएको अनुमान गरिएको छ। हालैको आन्दोलनपश्चात् जेलबाट हजारौं कैदी भागेको घटना, सीमापार अपराधको जोखिम र श्रम गन्तव्य मुलुकले देखाएको सुरक्षा चिन्ता पनि छलफलको प्रमुख विषय बन्न पुगेको बताइएको छ।
प्रधानमन्त्री कार्की र प्रधानसेनापति सिग्देलबीचको भेटलाई कूटनीतिक वृतले पनि नजिकबाट नियालेको छ। मुलुकको राजनीतिक भविष्य, स्थिरता र अन्तर्राष्ट्रिय विश्वसनीयता कायम राख्न सेनाको सक्रिय भूमिकाको सन्देश दिनेगरी भेटलाई अर्थपूर्ण मानिएको छ।
विशेषज्ञहरूका अनुसार, यो भेटले मुलुकको शान्ति–सुरक्षा संयन्त्रलाई थप मजबुत बनाउन सहयोग गर्ने अपेक्षा गरिएको छ। सरकार र सेनाबीचको सहकार्य सुदृढ हुनुले दीर्घकालीन स्थायित्वमा योगदान पुर्याउने विश्वास गरिएको छ।
सम्पादक:
लोकेन्द्र भण्डारी
समाचार संयोजक:
सुनिल आचार्य
रिपोर्टर:
अनिता बिष्ट
सरोज वोलखे
