देशभर विद्रोह जारी प्रदर्शन चर्कियो,नेताको निवास तथा सरकारी कार्यालयहरूमा लक्षित हमला

काठमाडौँ — सरकारको दमनका कारण १९ जनाको ज्यान गुमिएको घटनाको विरोधमा “जेन जि” आन्दोलन चर्किँदै गर्दा देशभर व्यापक प्रदर्शन जारी छ। प्रदर्शनकारीले सहर–सहरका चोकमा टायर बाल्दै नेता निवास तथा सरकारी कार्यालयहरूमा लक्षित हमला गरेका छन्।

मंगलबार बिहान, सञ्चारमन्त्री पृथ्वी सुब्बा गुरुङको ललितपुर सुनाकोठीस्थित घरमा आगजनी भएको छ। माओवादी अध्यक्ष पुष्पकमल दाहालको निवास खुमलटारमा तोडफोड र प्रहरी बिटमा आगलागी गरिएको छ। रौतहट, सर्लाही र सुनसरीको इटहरी लगायतमा पनि आन्दोलनकारीले आगजनी गरेका छन्।

काठमाडौं, भक्तपुर, ललितपुर लगायतका जिल्लाहरूमा कर्फ्यू उल्लंघन गर्दै प्रदर्शन जारी छ। प्रदर्शनकारीहरूले चोक–चोकमा जमघट गरी सरकारविरुद्ध नारावाजी गरिरहेका छन्। सुर्खेतमा प्रधानमन्त्री कार्यालयभित्र प्रवेश गर्ने प्रयास र सुदूरपश्चिमको मुख्यमन्त्री कार्यालयमा प्रदर्शनकारीहरू प्रवेश गरिसकेका छन्। कोशी प्रदेशसभाको सचिवालयअगाडि पनि विरोध प्रकट गरिएको छ।

सोमबारको हिंसामा १९ जनाको मृत्यु र सयौँ घाइते हुनु, यस विरोधलाई थप तीव्र बनाएको छ। आन्दोलनकारीले सर्लाहीमा नेकपा एमाले, नेपाली कांग्रेस र माओवादी केन्द्रका पार्टी कार्यालयहरूमा आगजनी र तोडफोड गरेका छन्। प्रहरी बिट र निवास क्षेत्रहरूमा ढुंगामुढा गरिएको दृश्यहरू रिपोर्ट भएका छन्।

आज बिहानदेखि नै ललितपुरका विभिन्न स्थानहरूमा प्रहरी बिट र प्रहरी कार्यालयहरूमा आगजनी भएको छ। हरिसिद्धीस्थित प्रहरी प्रभागमा समेत आगाको घटना घटेको छ।