रामहरि खतिवडाको राजीनामापछि राज्य व्यवस्था समितिको सभापति चयनमा कांग्रेसमा नयाँ उम्मेदवार चयन प्रक्रिया सुरु

काठमाडौं – नेपाली कांग्रेसको पदाधिकारी बैठक आज (सोमबार) बिहान १० बजे पार्टी सभापति शेरबहादुर देउवाको निजी निवास बूढानीलकण्ठमा बस्ने भएको छ। बैठकमा प्रतिनिधिसभा अन्तर्गत राज्य व्यवस्था तथा सुशासन समितिको सभापति पदको उम्मेदवार चयन र उपसभामुख इन्दिरा रानामगर सम्बन्धी विवादमा विस्तृत छलफल हुने कांग्रेस स्रोतले जनाएको छ।

गत साउन २८ गते संघीय निजामती सेवा विधेयक मा ‘कुलिङ पिरियड’ सम्बन्धी विवाद उत्पन्न भएपछि तत्कालीन सभापति रामहरि खतिवडाले पदबाट राजीनामा दिएका थिए। प्रतिनिधिसभा नियमावली अनुसार समितिको रिक्त पद १५ दिनभित्र निर्वाचनमार्फत पूर्ति गर्नुपर्ने प्रावधान भएकाले कांग्रेसमा उमेदवार चयनको प्रक्रिया सुरु भएको हो।

यसअघि कांग्रेस र एमालेका सांसदहरुले उपसभामुख रानामगरमाथि पदीय आचरण विपरीत कार्य गरेको आरोप लगाउँदै हस्ताक्षर संकलन गरिसकेका थिए। तर, कांग्रेसभित्र यस विषयमा मतभेद देखिएको छ। सभापति देउवा निकट समूह हस्ताक्षरको पक्षमा भए पनि डा. शेखर कोइराला, महामन्त्री गगन थापा र विश्वप्रकाश शर्माले यसको खुला विरोध गर्दै आएका छन्।

आजको बैठकले सभापति उम्मेदवारको नाम टुंग्याउने मात्र नभई उपसभामुखसम्बन्धी पार्टीको आधिकारिक धारणा पनि तय गर्ने अपेक्षा गरिएको छ। यसलाई आगामी प्रतिनिधिसभा बैठकमा कांग्रेसले कसरी प्रस्तुत गर्ने भन्नेबारे पनि अन्तिम निर्णय हुने अनुमान गरिएको छ।